«Шудком» вите визьлюкъёсты

Ачиз сярысь клуб нырысьсэ вераз 2016-тӥ арын. Пумиськонъёс ортчылӥзы толэзьлы быдэ ӟуч «60 секунд» шудон сямен. Шудонлэн нырысетӥ сезоназ вормиз Ижкарысь «Валамон-Паримон» команда. Кыкетӥ луиз «Кынкорт», куинетӥ — «Кыло-ымо».

Татын пӧртэм юанъёс пумисько: одӥгъёсыз эскеро тынэсьтыд котыр ласянь тодонъёстэ, мукетъёсыз малпаськыны быгатэмдэ. Татын удмуртлыкен но герӟаськем юанъёс пумисько.

Выль сезонэн шудонэ воштӥськонъёс но вуо. Нырысь ик, пусъйыны луоз выль интыез: «Old Fox» кафеын табере тросгес командаос шудонэ пыриськыны быгатозы. Со сяна ӧвӧл вунэтоно выль кырӟасьёс но аспӧртэмлыко визьсынанъёс сярысь. Нош ӝытэз дышем сямен нуоз шугъяськытӥсь юанъёсты усто сётъяны быгатӥсь Александр Бикузин.

Шудонэ пыриськон понна 6 адямилэсь команда люкано но udmshundy@mail.ru почтае заявка келяно. Отын пусъёно командалэсь нимзэ, пыриськись адямиосты но герӟетъёсты. Дыртэ, 20-тӥ южтолэзьлэсь бергес вуэм заявкаос лыдэ уз басьтӥське ни.