Шор мечеть усьтӥськиз Ижкарын

«Шор мечетез лэсьтонэ зэмзэ но вань калык пыриськиз. 20 сюрслэсь трос мусульманъёс коньдон висъязы. Куд-огез нылкышноос асьсэлэсь чеберъяськонъёссэс вайылӥзы — зундэсъёссэс, пельугыоссэс. Кӧня ке воргоронъёс завещание кельтӥзы, соослэсь корказэс но патерзэс вузамлэсь коньдонэз мечетез пуктонэ мед кутозы шуыса. Тросэз ас мылкыд каремзыя дунтэк лэсьтӥськонын ужазы», — вераз мечетьысь имам-хатыб Нагим Каюмов.

Лэсьтӥськон оглом 110 миллион манет тыр усиз. Лэсьтӥськонын юрттэмзы понна Удмуртиысь муфтият тау кариз элькунлэн тӧроезлы Александр Соловьёвлы, улосвыллэн нырысетӥ азьмуртэзлы Александр Волковлы, карысь кивалтӥсьёслы Юрий Тюринлы но Ильдар Бикбулатовлы, Татарстанлэн кун советникезлы Минтимер Шаймиевлы но Татарстанлэн азьмуртэзлы Рустам Миннехановлы, Ижысь электромеханикая «Купол» заводлы но Удмуртиысь Йӧскалык банклэн азьвыл кивалтӥсезлы Равиль Каримовлы.

«Ижкарысь но быдэс элькунысь мусульманъёс та пусйымон нуналэз кема возьмазы. Вамыш бӧрсьы вамыш трос радъян ужпумъёсты сэрттоно-пертчоно луиз. Нош кӧня ужазы лэсьтӥськисьёс таӵе чебер юртэз ӝутон понна. Соослы но ми туннэ тау карыны кулэ! Шор мечеть вылын ми эшшо одӥг пол валамы: кин быгатыса но мыр-мыр аслэсьтыз лэсьтэ — со котьку азинлык басьтэ», — пусйиз улосвыллэн тӧроез Александр Соловьёв.

Россиысь Вылӥ муфтий люкаськемъёс азьын вераськоназ пусйиз, Инмар но вӧсьлыкъёс одӥге юн герӟаськемын шуыса. Озьы ик элькун кивалтӥсьлы Удмуртиын улӥсь калыкъёслэсь лулпуш дуннезэс улӟытонын юрттэмез понна тау кариз.

«Кар чеберске. Котьма ке но, нырысь ик православи храмез но выльдӥзы, кыӵе зарни куполъёсыз! Мечеть но 13 арсын дыртытэк. Кытчы милемлы дыртыны? Милемлы улонысь кошкыны вазьгес на, милям ужъёсмы вань на», — вераз Талгат-хазрат.

Ӟуч православи черклэсь Шор мечетез усьтонэн ӟечкыланзэ сётӥз Ижысь но Удмуртиысь митрополит Викторин. Озьы ик выль храмлы ковер кузьмаз.

Сиё-дано ужрад бере инмарлы оскисьёс мечетьын намаз ортчытӥзы.

ВАТСАН

Шор мечеть — ньыль этажъем, 45 метр ӝужда кык валтӥсь минаретъёсыз но одӥг пичиез. Храм 1 сюрс 500 адямилы чакламын: 1 сюрсэз воргоронъёслэн висъетазы, 500 — нылкышноослэназ. Нялтас вераса, мечетьлэн липет вылаз, элькунлэн аспӧртэм тодметэз сямен, удмурт пус суредамын.