Школаосын «Герои народа — герои страны» проект ужаны кутскоз

Элькунысь школаосын «Герои народа — герои страны» нимо проект ужаны кутскоз. Со сярысь туннэ Калыкъёслэн Эшъяськон юртазы дышетӥсьёслы веразы.

Йӧскалык лыдӟиськонниын 800 пала фронтысь гожтэтъёс утисько. Со ӟуч, удмурт, бигер кылъёсын семьялэн ёзчиосыз куспын гожъяськемъёс. Ёрос но школа музейёс утё на треугольникъёсты.

Внеклассной урокъёсын дышетӥсьёс 7-тӥысен 11-тӥ классъёсын дышетскисьёслы нацистъёс, фронтысь геройёс, Быдӟым Атыкай ожлэн зэмос учыръёсыз сярысь вераны, гожтэтъёсын тодматыны кулэ луозы.

Нош собере пиналъёс ӵектэм темаослы эссе гожтозы. Эсселэсь вормисьсэ Вормон нуналэ — 9-тӥ куартолэзе — ялозы. Кузьым — Москвае путёвка.

Проект 2015-тӥ арысен улонэ пыӵа. Сое кылдытӥз Ижкарысь еврейёслэн огазеяськонзы. Солэн ёзчиосыз туэ проектэнызы Росси Президентлэн фондысьтыз грант утӥзы. 10 сюрс ӵектосъёс пӧлын вылӥ дунъямын вал.