Шаркан ёросын улонэ пыӵаны кутскиз «БыгыГур» проект
Кызьы шуо радъясьёс, ӵектос сӥземын Быгы гуртлы, но таяз радэ «гур» чик герӟаськемын ӧвӧл пересьмонэн (перепечен) яке табань пыжонэн, со возьматэ крезьгурез.
Ӵектос кылдытэмын Быгы гуртысь удмурт калык кырӟанъёсты, туала амалъёс кутыса, нылпиос но егитъёс пӧлын утён но вӧлмытон вылысь, озьы ик Удмурт Элькунысь гуртъёсын улӥсь пиналъёсты, туала крезьгурчиосты-аранжировщикъёсты но фольклористъёсты огъясь инты кылдытон понна.
– Проектмылэн валтӥсь ужез – туала егит композиторъёсынымы вашкала удмурт кырӟанъёслы туала шӧм пыӵатыса фонограммаос гожтон. Собере соосты нылпиосмы но егитъёсмы быдэсъяны мед быгатозы. Одно ик со фонограммаосын чузъяськыны кулэ калык инструментъёс (кубыз, арган, крезь), – верало «БыгыГур» проектлэн радъясьёсыз.
Ӵектос бордын тыршо удмурт лулчеберетъя «Быгы» йӧскалык центрысь ӧнерчиос. Туннэ нуналлы соос проектлэн 1-тӥ этапез борды басьтӥськизы ни. Быгыысь 10 вашкала кырӟанъёс быръемын, соослы азьпалан выль «шӧм» пыӵатоно луоз.
Проектъя вань ивортонъёсты учкыны-чакланы луоз Мастерская этноязыкового творчества «БыгыГур» «ВКонтакте» бамысь.