«Эру» шулдыръяськонэ 8 команда пыриськиз

«эру» шулдыръяськонэ 8 команда пыриськиз 1 Иворъёс

Быгато-а туала егитъёс черсыны, пу пильылыны, карнанэн ву нуллыны? Тае 22-тӥ пӧсьтолэзе эскеризы Шаркан ёросысь Зар-Вишур гуртын. Отын «Шунды» огазеяськон быдэ вуонлы сӥзем «Эру» шулдыръяськонзэ ортчытӥз.

Ӵапак «Эруын» вашкалаосмы учко вал, дасесь-а соослэн пиналъёссы бадӟым улонэ вамыш лэсьтыны. Соослы трос кужым но чидан сӥзьыса, нош берло быгатонлыкъёссэс адӟыса арлыдоос «Эру!» шуыса кесясько вылэм.

Таяз радэ празднике Шаркан, Глазов, Алнаш но Вавож ёросъёсысь, Татарстанысь но Башкириысь 8 команда пыриськиз.

– «Эру» луоз шуыса тодэме бере, школаысьтым удмурт кылын вераськись пиналъёсты люкай, – вераз Башкириысь Калтасы ёросысь Каськын гуртысь Данила Ахметшин, – празднике вуон понна 4 часын ӵукна султӥмы. Чик но ӧм жалялэ, сокеме лыктӥмы шуыса! Удмуртиын туж шулдыр!

Котькуд командаын 4 ныл но 4 пи вал, азьло соос люкаськем калыкез аснызы тодматӥзы, квест шудон пыр ортчизы, кырӟаны-вераны быгатэмзэс возьматӥзы.

Нош тужгес но тунсыко вожвылъяськон «Кык дыдыкъёсты» витиз. Котькуд командаысь быдэн 1 ныл но 1 пи юри соос понна радъям ӵошатсконын вормон понна нюръяськизы. Нырысь ик нылъёс пельпум вылазы карнан ошыса, киосазы 2 ведра кутыса, пруд доры ву дуре васьказы. Кин тросгес ву вайыны быгатоз – со ик азьпала потоз. Бӧрысь паръёс пилаен пу вандӥзы, нош пиос пуклёкъёсты пильылӥзы. Таяз радэ егитъёсты нырысьсэ табань пыжытӥзы: пиос но быгато вылэм гур котырын берганы. Но черсыны нылъёс кадь уг пӧрмыто, вакчи дыр куспын соослэн чупрес векчи чиньыоссы ыжгонэз юн сӥньыслы пӧрмытӥзы. Гуртысь клуб котырез чеберъян понна дыдыкъёс пуысь пичи клумбаос лэсьтӥзы на. Пӧртэм сэрегъёсысь вуэм егитъёс татчы асьсэлэсь пытьызэс кельтӥзы.

Озьы, вожвылъяськонлэн вань люкетъёсаз асьсэдыз усто ласянь гинэ возьматыса, нырысетӥ инты басьтӥз Татарстанысь «Ӟардон» команда. 2-тӥ луиз Шаркан ёросысь Сосновка гуртысь «Шулдыр мылкыд» команда, нош 3-тӥ – Вавож ёросысь Партчи гуртысь «Кинэ шедьтӥм – сое кутӥм» команда.

Поделитесь с друзьями:
Дом Дружбы народов