«Шагаем Вместе» тужгес но ӟечъёсыз пӧлын!

26-тӥ пӧсьтолэзе огъя Россиысь егитъёслэн «Территория смыслов на Клязьме» дышетон форумзылэн IV сменаезлэн сӥё-дано ворсан ужрадэз ортчиз. Татын тодмо луизы вормисе потэм ӵектосъёс. Вераны кулэ, егитъёслэн форумзы 28-тӥ инвожоысен 28-тӥ гудырикошконозь ужа. Та дыр куспын 8 смена радъяське. «Конвейер проектов» — 4-тӥез смена. Сменае пыриськыны 125 заявка сётэмын вал. Соос пӧлысь 115-ез кутэмын вожвылъяськонэ. Йӧскалык политика удысысь 25 ӵектосъёсты быдэстыны 4,8 млн. манет коньдон висъяськоз.

Удмурт Элькунлэсь данзэ форумын утизы Калыкъёслэн Эшъяськон юртысьтыз ӧнерчиос – Ирина Трубицина, йӧскалык кусыпъёсъя ёзэтлэн методистэз, но Мария Царёва, Удмурт Элькунысь егитъёслэн мерлыко огазеяськонъёссылэн «Вместе» ассоциацизылэн кивалтӥсез. Ирина тодматӥз Россия Федерациысь финн-угор егитъёслэн центрзылэн дышетон программаеныз, нош Мария «Шагаем Вместе» йӧскалыккуспо лагерь сярысь вераз. Кыксэ но ӵектосъёсты жюри синйылтӥз. Нош «Шагаем Вместе» ӵектос вормисе потӥз. Сое быдэстыны 300 сюрс манет висъямын.