Шаерын кузёяське вожодыр

Вашкалаос оскылиллям: вожодыр, пӧртмаськон вакыт — сьӧд кужымъёслэн кузёяськон дырзы. Удмуртъёслэн со язычествоен герӟаськем сям-йылолзы.

«Но вожоос корка пыро ке, вань уродзэ улляло, шуд пырто, шуэ «Лудорвай» музейысь ӧнерчи Анна Куликова. — Нянен, ческыт сиёнэн, шуныт чаен пумитано соосты. Ӟеч куно карыса лэзёно вожоосты коркась».

Берло дыре калыкын пӧртмаськон сям аслэсьтыз зэмос пуштроссэ ыштӥз ини. Со огшоры шулыдръяськонлы укшаны кутскиз. Соин ик Лудорвай музей-заповедникын ужасьёс вожодырлы нимысьтыз саклык висъяны малпазы.

«Пиналъёс тодыны кулэ вашкалаослэсь улэм-вылэмзэс, — шуэ «Лудорвай» музейысь тодосъя валтӥсь ӧнерчи Елена Келарева. — Музейын та вожодыр шулдыръяськонэз нырысьсэ ортчытиськом. Али толлэн туж тунсыко вакытэз. Ымусьтонысен йӧ вылэ султонозь кыстӥське со».