Шаерамы ортчо алнаш литературалы сӥзем нуналъёс

Ваньзылы тунсыко вал — мар сыӵе нуналъёс со — Алнаш литературалы сӥзем.

Валэктон сётӥз Национальной библиотекалэн директорез Татьяна Тенсина:

— «Удмуртиысь ёросъёслэн литератураоссылэн нуналъёссы» — милям выль проектмы, со сӥземын шаерысьтымы валтӥсь библиотекалэн 100 ар тырмонэзлы. Та бадӟым юбилеймес ми вуоно арын пусъёмы. Проект луонлык сётэ мургес тодматскыны шаерысьтымы гожъяськисьёслэн творчествоенызы. Ар пумозь ортчозы на алнаш литератураен герӟаськем трос ужрадъёс, собере выжомы мукет ёрос вылэ.

Алнаш ёрос алфавитъя нырысетӥез, но соин сэрен гинэ со бордысен ӧз кутске. Ӵапак со кузьмаз шаермылы тужгес уно писательёсты но поэтъёсты. Семён Самсонов юнме шуымтэ вылэм: «Алнаш палъёсын литератураын кырӟамтэ одӥг но писпу ӧз кыльы ни, дыр».

— Милям гожъяськисьёсмы удмурт литератураез кужмогес каро, — вераз Алнаш ёрослэн йырыз Алексей Семенов. — Соос сярысь будӥсь поколениос но мед тодозы шуыса, пӧртэм ужрадъёс, пумиськонъёс, конференциос ортчытъяськом.

Зэм но, Алнаш ёросын Ходырев, Борисов, Байтеряков нимо лыдӟонъёс радъясько, Алнашын Ашальчи Окилэн но Г. Красильниковлэн музей юртъёссы ужало. Ёросын 7 гожъяськисьёслы буре ваён пулъёс юнматэмын, З ёрос премиос кылдытэмын: А. Оки, Т. Борисов но Г. Ходырев нимо. 5 школаос дано дышетскисьёссылэсь нимъёссэс нулло: Алнашын — Г. Красильниковлэсь, Ӟатчаын — Н. Байтеряковлэсь, Асанын — Т. Борисовлэсь, Усоын — Н. Васильевлэсь, Сизьгуртын — П. Черновлэсь. Озьы ик тросэзлэн писательёслэн нимъёссы черкогуртъёсысь но гуръёсысь урамъёслы сётъямын. Алнашъёс данъясько азьвыл но туала гожъяськисьёсынызы, шумпото выль нимъёслы, ужъёслы.

— Ми та ужрадлы кема дасяськимы, — шуиз культурая но туризмъя министрлэсь ужзэ быдэсъясь, алнаш воргорон Владимир Соловьёв. — Туж шумпотӥсько, быдэс зал калык люкаськиз шуыса. Проект но туж тунсыко. Берпум дыре асьмеос ӧжытгес лыдӟиськыны кутскимы. Нош нылпиосыз эшъяськонэз, калыкъёс куспын тупаса улонэз данъясь литература вылын будэтоно.

Уно тунсыкозэ вераз педагогика наукаосъя кандидат, Алнаш ёросын будэм Любовь Фёдорова. Со эскерем алнаш гожъяськисьёслэсь ужъёссэс, кылем даурысен кутскыса, туннэ нуналозь.  Ваньзэс нимын-тулын вераз, улон сюресэнызы, книгаосынызы тодматӥз.

Ӝытэз азьланьтӥзы кылбуръёс: куд-огзэ лыдӟизы асьсэос авторъёс, куд-огзэ — лыдӟисьёс, соос чузъяськизы ӟуч, удмурт кылъёсын. Шуом, улонысь туж вазь кошкем Василий Кибардинлэсь кылбурзэ лыдӟиз сузэрез, «Мынам Удмуртие» телерадиокомпаниысь журналист Светлана Кибардина. Аслаз творчествоеныз тодматӥз Юлия Кузьмина. Со сяна, сюлэме пырымон кылбуразы Алнаш ёросысь культурая ёзэтэн кивалтӥсь Наталья Антонова, Удмурт филармониысь администратор Михаил Михайлов, Кун Кенешысь депутат Алексей Вахрушев но мукетъёсыз.