Дом Дружбы народов

    Шаерамы ортчизы 25-тӥ Герд лыдӟонъёс

    Шаерамы ортчизы 25-тӥ герд лыдӟонъёс 1

    25-тӥез Кузебай Герд лыдӟонъёс Анай кылъёслэсь калыккуспо нуналзэс, Дышетӥсьёслэсь но нодъясьлэсь (наставниклэсь), Удмурт Элькунын егитъёслэсь арзэс пусъён улсын ортчизы.

    Конференцилэн валтӥсь темаез вал – «Кузебай Герд: дауръёс куспын».

    «Удмурт Кенеш» огазеяськонлэн Тӧроез Андрей Иванович Ураськин аслаз вераськоназ пусйиз:

    – Кузебай Герд трос кужымзэ, тодон-валанзэ поныса ужаз анай кылзэ утён, узырмытон но азинтон бордын. Быдэс творчествояз пыӵамын удмурт калык сярысь, калыкезлэсь асваланзэ ӝутон сярысь сюлмаськонэз. Ваньмыз со –толло, туннэ, ӵуказе нуналлэсь историзэ кылдытэ, тодос но дышетон удысъёсты, кылэз, лулчеберетэз утьыны но азинтыны инъет луэ. Кузебай Гердлэн лэсьтэм ужъёсыз выльысь но мургес малпаськыны, выжыосмес герӟась «сӥньысэз» утьыны, синйылтыны, эскерыны, санэ поныны косо кадь. Соин но, дыр, асьмеос солэсь верам-эскеремъёссэ выльысь, пӧртэм ласянь бергатӥськомы, мургес но рос-просгес валаны, архив документъёс пыр тодмо но тодмотэм сюресъёссэ сэрттыны-пертчыны тыршиськомы.

    Кузебай Герд 19-тӥ но 20-тӥ дауръёс куспын ке но вордӥськемын, солэн улон сюресэз но творчествоез, дунне шоры учконэз туннэ нуналлэн куронъёсыныз юн но мур пӧлэстӥськыса кошко.

    – Ӟеч лэсьтэм ужъёсынымы гинэ вераны быгатомы: быдэсмиз-а Кузебай Гердлэн осконэз? Лыктӥзы-а «араны» егитъёс? Кыӵе мылкыдын дышето туала нылпиос Кузебай Гердлэсь произведениоссэ? Кыӵе герӟась сӥньыссэ соос адӟо туннэ но азьло вакытъёсысь? – йылтӥз Андрей Иванович.

    Та но мукет юанъёсъя кенешон мынӥз люкаськонын, докладчикъёслэн вераськоназы. Ужрадэ 25 ёросъёсысь но 4 каръёсысь, озьы ик Татарстанысь, Башкортостанысь, Киров но Пермь улосъёсысь, Марий Элысь 437 адями пыриськиз. Делегатъёс пӧлын вал ёросъёсысь но каръёсысь «Удмурт Кенешлэн» кивалтӥсьёсыз но ёзчиосыз, тодосчиос, эмчиос но дышетӥсьёс, лулчеберет удысын ужасьёс, школаосын но вузъёсын дышетскись пиналъёс.

    Шаерамы ортчизы 25-тӥ герд лыдӟонъёс 2
    Шаерамы ортчизы 25-тӥ герд лыдӟонъёс 3

    Герд лыдӟонъёс йылпумъяськизы секыт, кужмо, малпаськытӥсь «Трокай» спектаклен. Сӥземын со удмурт кылтодосчилы, мер ужасьлы, публицистлы, эмчилы, удмуртъёслэсь автономизэс кылдытон бордын тыршисьлы Трофим Борисовлы.

    Спектакльын Трокай Борисовлэн пӧртэм улон вакытъёсыз возьматэмын (пьеса гожтэмын документъёс, гожтэтъёс, тодэ ваёнъёс вылэ пыкиськыса). Учкисьёс азе Кузебай Герд но, Ашальчи Оки но потазы.