Сэпын усьтӥськоз бырем гуртъёслы сӥзем музей

Эгра ёросысь Сэп гуртысь культурая юртын  бырем гуртъёс сярысь материалъёс вазенгес бичаны кутскиллям вылэм ни.

— Сэп котырын бырем гуртъёс туж трос. Бисар, Ыжнюк, Пежвай Йыл, Лужаны, Новая Деревня (Митроки и Троицкое), Николаевка, Палым — та сизьымез сярысь ми альбомъёс лэсьтыны кутским, — вера Эгра ёросысь Сэп гуртысь культурая юртэн кивалтӥсь Татьяна Мосова. — Ми гожъямы тодэ ваёнъёсты, люкамы туспуктэмъёсты. Гурт калык гурт котырысьтыз вашкала арбериоссэ но дорамы нуллыны кутскиз. Озьы туж трос материалмы люкаськиз.

Огпол Сэпе культрегер Александр Юминов вуэм, со альбомъёсты адӟем но шуэм: «та дась проект ук!». Озьы проект гожтыса лэзем 4 интые, огаз ке но, оло, уксё висъялозы. Проект утэм Россиысь Президентлэсь грантсэ, Потанинлэн фондысьтыз но «Перспектива» фондысь уксё — оглом 2 миллион манетлэсь уно. Та коньдон тырмиз музей но лэсьтыны, адямиосты музейын ужаны но дышетыны. Сэпысь культураын ужасьёс ар ӵоже Нижний Новогородэ дышетскыны ветлӥллям.

— Нырысьсэ Сэпе вуылыкум, мон адӟи нюксэс. Шуи: тае утялтэ но шутэтскон интылы пӧрмытэ, — вера Александр Юминов. — Мукет дыръя вуыкум, монэ отын табанен сюдӥзы ни. Одӥг гуртысь но таӵезэ ӧй пумита на вал: татын верам кылэз пелязы поно но уг вунэто, быдэсто. Музей сяна, милям вань ини мукетыз но проектмы. Гуртэ лэсьтоно культурной квартал. Сое радъялозы Самара университетысь студентъёс, вуоно архитекторъёс, гурт калыкен ӵош.

Музей туала амалъёсты кутыса лэсьтэмын, со улэп! Отысь котькуд арберилэн вань историез, котькуд гуртлэн — лулыз.

— Музее быдэс шаерысьтымы калыкез кыскон понна, ми со котырын пӧртэм ужрадъёс ортчытъялом. Ми вераським ини туристической агентствоосын, бырем гуртъёслы сӥзем музей усьтӥськемез бере ик пыртэмын луоз Сибирь трактлы но Лопшо Педуньлы сӥзем маршрутъёсы, — вера Эгра ёрослэн йырыз Татьяна Чуракова.