Сепе — куное
Котырес ӝӧк сьӧрын куинь час ӵоже нылпиослы удмурт кылэз яратон мылкыд пыӵатонын кутӥськись амалъёс сярысь вераськон мынӥз. Ӝутэмын вал шуг-секытъёс но, утчамын отысь потон амалъёс.
Трос тунсыко дэмланъёссэ вераз И.Ф. Тимирзянова, «Вордскем кыл» журналлэн ёзэтэзлэн редакторез. Ёросысь «Удмурт Кенешен» ортчытыны чаклам ужрадъёс сярысь вераз Т.К. Мосова, огазеяськонлэн но Сеп культура юртлэн кивалтӥсез. О.А. Степанова, ёрос библиотекаысь ӧнерчи, «Удмурт Кенеш» пыр удмурт кылэз дышетонъя курсъёслэн мынэмзы сярысь мадиз.
Н.Н. Владыкина люкаськем калыкез Сеп нылпи садын чагыр инбам улын кылдытэм музеен тодматӥз. Берло Т.К. Мосова бырем гуртъёслы сӥзем музейын ужъёслэн мынэмзы сярысь мадиз, вуоно музейлэн юртаз пыртылӥз. Пумиськон «Лӧптэм табань» нимо интыын пӧсь табанен куонояса йылпумъяськиз.
Ёросысь, Ижысь вуэмъёс туж паймизы сеп калыклы. Татын улӥсьёс удмурт кылзэс уг вунэто, песянай-песятайёссылэсь сям-йылолъёссэс утё, тодэмзэс егитъёслы выжто. Азьланяз Сепе эшъёссэс, нылпиоссэс вайылыны чаклало.