Сэп котырысь бырем гуртъёс калыксэс выльысен люказы

Бисар, Ыжнюк, Пежвай Йыл, Лужан, Новая (Митроки и Троицкое), Улысь Луд, Палым — та гуртъёс сюризы Сэпысь музее. Одӥг музейын люкамын калыклэн тодэ ваёнъёсыз, туспуктэмъёс, вашкала арбериос но мукет. Котькуд арбери — луло. Кылсярысь, тани кыллё Афанасий Лужанинлэн (басня гожъясь бырем Лужан гуртын вордскемын) песьтэрез но гожъяськон машинкаез. Музейлэн оглюкетэз — со Афанасий Лужанин нимо библиотека.

Музей утӥз 3 миллион манет грант, сое сётӥзы В. Потанинлэн фондэз но пичи городъёслы но гуртъёслы юрттӥськись «Перспектива» фонд. Озьы луонлык кылдӥз туала но чебер музей кылдытыны — таӵе музейёс Ижын но трос ӧвӧл. Солэсь туссэ кылдытыны юрттӥзы Самараысь вуоно дизайнеръёс.

— «Вошъяськись музей вошъяськись дуннеын» номинацие арлы быдэ 400 проект вуэ, ми 20-езлы гинэ уксё висъяськом, — вера В. Потанинлэн фондысьтыз Ирина Лапидус. — Ми дурбасьтӥськом выль амалэн кылдытэм музейлы, азьланяз со мукет музейын ужасьёслы но тунсыко мед луоз. Та югдур тросаз улосвылъёсын пумиськылэ: гуртъёс быро, адямиос гуртэ улыны кыстӥсько.

Музеез усьтон нуналэ, 23-тӥ куарусёнэ, Сэпе вуизы бырем гуртъёсын улэмъёс. Вуизы сяськаосын но тодэ ваёнъёсынызы. Ог-огенызы вераськыса, музеетӥ ветлыса, соос выльысен вордскем палъёсазы вуылӥзы кадь.