Семьялэн кужымез — выжыосыз

    Семьялэн кужымез — выжыосыз 1

    Отчы пыриськизы Башкортостанысь пӧртэм ёросъёсын улӥсь удмурт семьяос. Кылсярысь, Татышлы ёросысь Шаритдиновъёс но Адуллинъёс, Балтач ёросысь Зиангировъёс, Янаул палъёсысь Нигиевъёс, Пермь улосысь Шарафутдиновъёс. Нош радъязы-нуизы ӝытэз Выль Татышлы гуртысь культурая юртын но библиотекаын ужасьёс.

    Люкаськем калык нырысь ик котькуд семьяен тодматскиз: соос мадизы выжыоссы, семьязылэн кылдэмез, удмурт сям-йылолъёсты чакламзы сярысь. Бӧрысь котькудӥз возьматӥз кырӟаны-вераны быгатэмзэ: анай-атайёссы вӧзын удмурт кырӟанъёсты быдэстӥзы нылпиос но. Котькудӥз семья туж усто кырӟа — кыӵе но кырӟанъёсты ӧз быдэстэ соос, эктыса но лэзизы! Ӝыт йылпумъяськиз пӧраськемъёссэс веръянэн: соос чиньыез ньылымон ческыт пӧрмиллям.

    Выль Татышлы гуртысь культурая юртын но библиотекаын ужасьёс котькуд семьяез пусйизы синпель кузьымъёсын но таукаронъёсын. Соослы азьланяз но сӥзизы семьяязы удмуртлыкез тазьы ик юн возьыны, будӥсь пиналъёссылы удмурт выжыоссэс гажан мылкыд пыӵатыны. Башкортостанысь удмуртъёслэн историяя но культурая центрысьтызы специалист Ирина Самигулова шуиз: Башкортостанын удмуртлыкез утёнлы бадӟым саклык висъяськом, таӵе ужрадъёс удмурт калыклэсь данзэ ӝуто, выжыосмес утьыны юртто.

    https://udmdunne.ru