Сарапулысь библиотекаын удмурт кылэз дышето

Туэ тулыспалэ удмурт кылэз дышетэм 15 адямиос басьтӥзы сертификат, сомында ик мурт курсъёсыз йылпумъяз оштолэзе. Туж мыло-кыдо, пӧртэм амалъёс утчаса, удмурт кыллы дышетэ Светлана Николаевна Толмачёва. Ӟуч карын со ласянь но шугъяськон — ӧвӧл удмурт кыллы дышетӥсьёс.

«Нош ми, — верало «Удмурт Кенеш» огазеяськонлэн Сарапул карысь ёзысьтыз азьветлӥсьёс, — курсъёсы ветлӥсьёс понна тыршимы на пӧртэм ужрадъёс пыр возьматыны, шараяны удмурт лулчеберетлэсь аспӧртэмлыксэ, удмурт калыклэсь сям-йылолъёссэ. Сяртчыен кокрок (тоторо) но перепеч пӧранъя мастер-класс ортчытӥмы, «Удмурт корка» сэрегамы возьматӥмы корка пырон йылолэз. Оштолэзе радъямы Ашальчи Окилы сӥзем «Мон тодам вайисько» кылбур ӝыт. Солэсь азьвыл «Данъяськомы нылкышноез» ужрадын лыдӟимы удмурт нылкышно кылбурчиослэсь Ашальчи Окилэсь, Лидия Черновалэсь, Галина Романовалэсь, Зоя Трухиналэсь но Юлия Байсаровалэсь кылбуръёссэс. Туж паймытӥзы Кам сьӧрын быдэсмем удмурт нылкышноосмы бигер-башкир гуръёсъя тэтчаменызы но жин-жин кырӟаменызы — кырӟанъёссылэн кылъёссы удмурт, нош гурзы бигер. Та ужрад пумын кенешим, гужем Сарапулын одно ик Гербер ортчытомы шуыса».

Вераны кулэ: Сарапулын ог 100 сюрс улӥсьёс пӧлысь 3,7 процентэз гинэ — удмуртъёс. Соос но тросэз ӟучомемын ини.