Сарапулын преник ӝыт ортчиз

Преник сюрс арлэсь кема ини Русьын тужгес ческыт кунояськон шуыса лыдъяське. Сое кузьым шуыса именниклы, сюанлы, мукет шулдыръяськонъёслы, озьы ик выль ар кызлы шудонлы, кураськисьёслы люкылон понна пӧраллязы. Куд-ог преникъёсы алфавитысь букваосты пуктылӥзы. Озьы пиналъёс лыдӟиськыны дышетскылӥзы.

Пумиськонын экскурсантъёс преник лэсьтон доскаосты дасясен Владимир Вострецовен тодматскизы. Со «Электрон» дворецын кибашлыослэн ёзэтазы ужа. Ӧнерчи возьматӥз пиналъёслы, кызьы азьвыл доскаосын преникъёс лэсьтылӥзы.

Озьы ик «Электрон» дворецын ужасьёс тодматӥзы кунооссэс удмурт но бигер культураосын. Веразы тангыра крезьгур инструмент сярысь, удмурт хороводъёс возьматӥзы, шудӥзы. Со сяна пиналъёс бигер эктон, кырӟан дышетӥзы, Кыш Бабаен (Тол Бабаен) пумиськизы.

Нош ужрад йылпумъяськыку котькудӥзлы кузьым – сарапул преник — сётӥзы.