Сарапул ёросысь Сигаево школаын анай кылэз данъян арня ортчиз

Сигаево школаын анай кылэн тодматскон, сое дышетон кружокын мынэ. Нина Бехметова пиналъёсын 6-ти арзэ ужа.
«Али удмурт кылэз кружок чотын гинэ нуыны быгатӥськом, — вера Нина Бехметова. — Милям удмурт сямен вераськись пиналъёсмы чылкак ӧвӧл. Ӟучомемын пиналъёсмы. Но кружоке пиналъёс шумпотыса ветло. Ми шудон пыр пыӵатӥськом анай кылэз».
 
Туэ эшшо одӥг классын кружок ужаны кутскиз. Дышетӥсь кема утчаны выризы. Мылкыд кариз Сарапуысь политехнической колледжысь экономика тодметэн дышетӥсь Наталья Батуева. Удмурт кылэз нуэмез ӧвӧл бере, пиналъёсын ӵош ачиз но дышетске, шуыны луоз. «Ӟеч-а бур-а, удмурт кыл» учебник — бадӟым юрттӥсь.
 
«Али мугор люкетъёсты дышетыны кутским. Пиналъёс капчиен валало, – шуэ Наталья Батуева. — Пудо-животэз туж мыло-кыдо дышетӥзы. Секытгес йӧтэ удмурт кылъёсты вераны, но соос тыршо».
 
Пичиен-пичиен, одӥг вамыш борды мукетыз — озьы ик мынэ анай кылэз чылкак ӟуч школаын дышетон. Кутскем ужлэн пайдаез азьпалан одно шӧдиськоз, шуо дышетӥсьёс. Пиналъёс вераськыны ке но ӧз кутске, валалозы анай кылзэс. Та ӧръя усто ужа «Удмурт Кенеш» огазеяськонлэн Сарапул ёросысь ёзэтэз.