Сарапул ёросын удмурт семьяослэн «Жильырты анай кылмы» фестивальзы ортчиз

Шевыръяловоысь гурт клублэн сцена вылаз пумиськизы Сарапул ёросысь удмурт семьяос: Сигаевоысь Пакрышевъёс, Нечкиноысь Кильмурзинъёс, Соколовкаысь Захаровъёс но Шевыръяловоысь Юшковъёс.

Фестивале пыриськисьёсты пумитазы Сарапул ёрос администрациысь лулчеберетъя но егитъёсын ужанъя ёзэтлэн кивалтӥсез Любовь Лихачева но «Удмурт Кенеш» огазеяськонлэн ёрос ёзэтэныз кивалтӥсь Нина Бехметова.

Семьяос пӧртэм заданиос пыр потӥзы. Нырысь ик соос асьсэ сярысь веразы, собере «Тӥледыз ческыт сюдом» конкурсын яратоно сиёнзэс веръятӥзы. Нош «Йылолъёс уг вуно коркаямы» вожвылъяськонын семьяязы утиськись сям-йылолъёсты возьматӥзы. «Ваче кимес кутыса» сӥземын вал быгатонлыкъёсты возьматонлы. Вань конкурсъёсы мыло-кыдо пыриськизы пичиос но, бадӟымъёс но.

Фестивале пыриськем котькудӥз семья аспӧртэм но тунсыко. Сое возьматӥз «Огазе кушласькон» нимо адӟытон. Отын котькуд семьялэн ёзчиез аслэсьтыз кибашлы быгатонлыкъёссэ возьматӥз.

Ужрад пумын люкаськемъёсты шумпоттӥз «Элькуновидение — 2017» вожвылъяськонэ пыриськем Павел Смирнов. Со крезьгуро кузьым кузьмаз. Со сяна фестивале пыриськем вань семьяосты радъясьёс дипломъёсын но синпель кузьымъёсын пусйизы.