Сарапул Сабантуйлы дасяське
Ужрадэз дасясьёслэн верамзыя, Кам шур дурын интыяськем карын Сабантуй уката но яркыт но тунсыко ортче. Туэ со эстафетазэ Вотка карлэсь басьтӥз. Празднике лыктэмъёслы трос паймымонэз дасямын.
Шаерыстымы каръёслэн куспазы эшлыко луэмзы шулдыръяськонлэн валтӥсь тодметэз луоз. Нырысь ик сое возьматозы сцена вылын праздникез нуисьёс. Соос Ижкарысь но Сарапулысь луозы. Собере «эшъяськон ульчаын» йӧскалык азбаръёс интыяськозы. Нош праздниклэн валтӥсь пусэз ромашка луоз – солэн тӧдьы бамъёсаз биниськемын яратон, чылкыт малпанъёс но выжы кусыпъёслэн кулэлыксы.
«Йӧскалык азбар» конкурсэ пыриськисьёс асьсэ выжызэс туспуктэмъёс, юртъер котырын кутӥськись арбериос, сиён-юон пыр возьматыны быгатозы.
Туэ Сабантуй яратонлэн но семьялэн нуналэныз герӟамын. Сое ӵапак 8-тӥ пӧсьтолэзе пусйиськом. Семья кусыпъёсты возьматӥсь праздник йӧскалык ужпумъёсын нокызьы герӟаськемын ӧвӧл. Соин ик асьсэлэсь азбаръёссэс возьматозы пӧртэм выжы калыкъёслэн семьяоссы. Яратон, ог-огдэ валан, мукет калыкъёслэсь лулчеберетсэс гажан – туала семьялэн узырлыксы.
«Шулдыръяськонын трос выжы калыкъёсты, йӧскалык сям-йылолъёсты утись семьяосты адӟем потэ вылэм», — малпанъёссэ шарая Калыкъёслэн Эшъяськон юртысьтызы валтӥсь ӧнерчи Ирина Омелюхина.
Сабантуй Сарапуллэн историеныз герӟаськем возьматонэн кутскоз. Солэн валтӥсь героез кавалерист Надежда Дурова луоз. Ӵапак солэн пичи дырыз ортчиз Кам дурын интыяськем карын. Со вакытысь улонэ вуттыны юрттозы сое яратӥсь песянаен песятай — абика но бабайка.
Калык кырӟанъёсты, эктонъёсты но бигер манерез вуттозы Ижкарысь но Сарапулысь фольклор коллективъёс. Озьы ик ӧтемын Татарстанысь Тукай ёросысь куноос.
Нюръяськонъя «Көрәш» вожвылъяськон Сабантуйлэн йылпуяськонэз луоз.