Сьӧлта ёросэз тодмо кароз тетера

Таӵе ужрадэз ортчытыны кичӧлтонэн потӥз ёросысь «Удмурт Кенешлэн» одӥгез ёзчиез Галина Иванова.

— Ёросысь коллективъёсынымы шаерамы ортчылӥсь пӧртэм удмурт ужрадъёсы вуылӥськом, — вераз нылкышно. — Люкаськемъёсты асьме палась пӧрам удмурт сиён-юонэн утялтӥськом. Милемлы паймымон потӥз, тетераез шаерамы уг тодо шуыса. Нош али тросэз ёросъёс пӧртэм сиён-юонъёслы сӥзем ужрадъёс ортчытъяло: эграос — пельняньлы, кезъёс — пешниклы, малы милемлы но сыӵе фестиваль радъянтэм кадь. Тетера сярысь мед тодозы быдэс Удмуртиын, та сиён асьме ёрослэн брендэз выллем мед луоз.

Тросэз юалозы, мар со сыӵе тетера? Со туж огшоры лэсьтӥське — тари, рис, чабей яке мукет ӝуке курегпуз шукконо. Кизер ке, пызь ватсано. Оладиез сямен, ӟырдам табае тыроно но ӝуась гур азьын, ӵыжыт луытозязы, пыжоно, вӧйын зырано. Таӵе ческыт сиёнэн но удмурт кырӟанъёсын пумитазы кунооссэс сьӧлтаос.

Тетера вашкала дырысь сиён шуыса сценка возьматӥзы Выль Мӧнья гуртысь кырӟась-верасьёс. Гуртысь нылпиослэн «Дарали» ансамбльзы удмурт эктонъёсын шулдыртӥз. Озьы ик асьсэ коллективъёсынызы но тетераез лэсьтон амалъёсынызы тодматӥзы Гопгуртысь, Толошурысь, Сюромошурысь, Югдонысь, Кӧпкалась но мукет гуртъёсысь ансамбльёс.

Шулдыр гуръёсын, ческыт пыжиськемъёсын фестивале вуизы Сюмси но Ува ёросъёсысь коллективъёс. Ува ёросысь Выль Мултанысь «Вумульы» ансамбль асьсэ палазы удмурт культураез вӧлмытэ ини 13 ар пала. Кивалтӥсьсы Нина Хамитова верамъя, тетера соослы но матын, гуртазы ӵемысь сое пӧрало.