«Сьӧд сюлык» книгаен тодматскон

— Мыным тунсыко гожъяськыны детектив, фентези амалэн. Та жанръёс сокем  уг жадьыто, — шуиз Елена Миннигараева. —  Аръёс ортчыса, кылдэ чакланы кутскиськод, валаськод, малпанъёс зэмало шуыса. Соин ик трагизмлэсь палэнскиськод, капчигес гожъяськыны кутскиськод. «Урдо»,  «Кытын тон, пие» выллем произведениосты гожтыку, тон ваньзэ сюлэм пыртӥд поттӥськод, геройёсыныд ӵош курадӟиськод. Калыклы соос ярало, адямиослэн пушсы вырӟе.

Лыдӟисьёс верало: Елена Васильевналэсь книгазэ усьтӥськод ке, лыдӟемысь дугдыны уг луы ни. Кылыз капчи, писатель ялан маин ке паймытыны быгатэ, саклыкез курике дэмӟытэ кадь.

— Детектив гожтон понна кулэ визь, логика. Мон ноку но уг дӥсьты сое гожтыны, малпалляй, — вера Елена Миннигараева. — Огпол редакциын чай юон вискын мыным дэмлазы, гожты ай, пе, детектив, кытысь ке мае ке лушкаллям, я Правительстволэн борддор вискысьтыз 50 аръёс ӵоже кыллем дуно арбери шедьтӥллям шуыса. Малпаськыны кутски, кытысь но мае лушкано, со одно ик удмуртлыкен герӟаськемын мед луоз. Со бордысен ик «Сьӧд сюлык» кутскиз. Вань музей, отын кыллё уксётӥрлыкъёс, сюлык…

— Удмурт литератураын детектив жанрен гожъясьёс ӧжыт. Тодэ лыкто Семён Самсоновлэн «Тугаськем бугор», Римма Лаптевалэн «Кион котьку сютэм» детективъёссы гинэ. Маин со герӟаськемын? Малпасько, та жанр узыр калыкъёслэн литератураязы зол азинскемын, отын мае ке лушканы, мар ке понна нюръяськыны луэ. — Малпанзэ вера педагогика наукаосъя кандидат Любовь Фёдорова. — Елена Миннигараевалэн «Сьӧд сюлык» произведенияз детективлэн вань куронъёсыз быдэстэмын. Со туж лыдӟымон, вакчи, уг жадьыты, ми пумозяз ум тодӥське, кин но малы музейысь сьӧд сюлыкез лушказ. Тунсыко, действие удмурт шаерын ортче шуыса.

Авторлэсь «Из» фентезизэ пыр-поч эскериз кылосбур наукаосъя кандидат Татьяна Душенкова. Шуиз: автор гожъяське вакчи но яркыт, троссэ пумозяз вератэк кельтэ. Елена Миннигараевалэн произведениосыз  лыдӟисез малпаськыто.

.