Россиысь улосъёсын удмуртлыкез азинтонъя форум ортчиз

Форумын пӧртэм ӧръёсъя котырес ӝӧкъёс ужазы. Удмурт лулчеберетэз гурт клубъёсын азинтон, билингва амалэн пиналъёсты дышетон, егитъёслы сӥзем удмурт чектосъёс гожъян — та сярысь вераськизы.

Ужрад кыкетӥзэ ортчиз. Киров улосын ӧй вал удмурт кылэз дышетонъя учебникъёссы, удмурт литературазы. Ӵапак та сярысь соос веразы кылем арын ортчем форумын. Нош туэ ини , Удмуртиысь йӧскалык политикая министерстволэн юрттэменыз, Киров улос узырмиз удмурт книгаосын. Табере югдур мукет — ужасьёс но дышетисьёс кулэ.

Нош Башкириын удмурт кылэз дышетонъя югдур умой, отын 40 пала школаосын удмурт кылъя тодон- валан сёто, потэ удмурт газетсы но. Башкириысь лулчеберетъя йӧскалык центрлэн кивалтӥсезлэн воштӥсез Юрий Саитовлэн верамезъя, Башкириын  удмурт кылын спектакльёсты учкемзы потэ. Соолэн сыӵе ӵектонзы — удмурт йӧскалык театрлы бускель улосъёсы ӵемгес потаны луонлык сётоно.

«Таӵе пумиськонъёсын люкаськемъёс ог-огзылы кужым сёто, визь сёто, быгатонлыксэс адӟыто, — вера форумез радъясь Флюра Чибышева. — Котькуд улосвылын удмуртлыкен герӟаськем ужъёс пӧртэм сямен мыно. Форуме лыкыса мед быгатозы вераны сюлмаськонъёссэс – кыӵе юрттэт возьмало удмурт элькунлэсь. Озьы ик мед вераны быгатозы, маин соос удмурт элькунын улӥсь калыкъёслэсь пӧртэмгес луо».

http://www.myudm.ru/