Россиысь удмуртъёслэн III ӧтчамзы дырысен 100 ар тырмонлы сӥзем тодосъя конференци ортче Сарапулын
Ужрадэ Удмуртилэн каръёсысьтыз но ёросъёсысьтыз, озьы ик Татарстанысь, Башкортостанысь, Пермь шаерысь удмуртъёслэн азьветлӥсьёссы, тодочиос, дышетӥсьёс люкаськизы
Пусъём, конференцилы кичӧлтон сётӥз «Удмурт Кенеш» огазеяськонлэн Сарапул ёросысь ёзэтэз. Соин ик Удмуртиысь йӧскалык политикая министр Лариса Буранова нырысь ик та карын улӥсь удмуртъёслы тау каремзэ вераз, угось кылдэмезъя ӟуч карын удмуртлыкез утён уж сокем ик капчи ӧвӧл.
«Туннэ та конференци удмурт калык понна гинэ пусйымон ӧвӧл. Со пусйымон ужрад быдэс элькун понна, малы ке шуоно ӵапак та ӧтчамъёс удмурт калыклы аслэсьтыз кунлыксэ басьтыны луонлык сётӥзы. Соин ик мон понна туж бадӟым ужрад», — пусйиз Лариса Буранова, Удмуртиысь йӧскалык политикая министр.
Озьы ик со пусйиз, вуоноез 2020-тӥ ар асьме понна «супер ар» луэ. Удмуртъёслэсь, Удмуртилэсь кунлык басьтон нуналзэ пусъем сяна, вуоно арын Вань удмуртъёслэн ӧтчамзы ортчоз, нош коньывуонэ Россиын улӥсьёсьёсты лыдъян-гожтон. Министрлэн верамезъя, со переписья тӧрлыкъёслэн но мер огазеяськонъёслэн ужамзылы дунъет сётыны луоз. Лыдъян-гожтон возьматоз, 2010-тӥ арын ортчем ужрадэн ӵошатыса, кӧнялы йылӥз яке кулэсмиз удмуртъёслэн лыдзы, тросгес яке ӧжытгес адямиос анай кылэнызы удмурт кылэз лыдъяло. Соин ик матысь ар ӵоже бадӟым валэктон уж нуоно луоз, выжызы сярысь юанлы валэктон сётыны шугъяськисьёс медаз луэ.
Озьы ик люкаськемъёслы Сарапулысь Кар думалэн тӧроез Сергей Смоляков вазиськиз.
«Ми туж данъяськиськомы, ӵапак Сарапулын ортчиз шуыса удмурт калыклэн куиинетӥ ӧтчамез, кудӥз нырысь ик автономи, собере кунлык басьтонэ вуттӥз», — вераз Сергей Смоляков, Сарапулысь Кар думалэн тӧроез.
Пленарной кенешонын тодосчиос, удмуртъёслэн нырысетӥ ӧтчамъёссылэн йӧскалык движениын, кунлык басьтонын интызы, туала лэчыт ужпумъёс сярысь ивортонъёс лэсьтӥзы. Озьы ик I ӧтчаме пыриськемъёсын, Сарапулын удмуртлыкез утён ужпумъёсын тодматӥзы.
Со сяна, праздник мылкыд кылдытӥзы Сарапулысь творчествоя коллективъёс. Озьы ик карысь учкымон интыостӥ экскурсия чакламын.