Россиысь тужгес устоез бигер кылъя дышетӥсь Ижкарын улэ

Россиын ортчем «Лучший учитель татарского языка и литературы» конкурслы йылпумъянъёс лэсьтӥзы 19-тӥ южтолэзе. Вормись луизы 2 дышетӥсьёс — Казаньысь Абдулла Алиш нимо 20 номеро гимназиысь бигер кылъя дышетӥсь Гульназ Галиева но Ижкарысь Габдулла Тукай нимо 6 номеро гимназиысь Расиля Габдрахманова.

Быдэс Россиысь конкурсэ 35 пыриськисьёс пӧлысь финалэ потӥз 10 адями. Пӧлазы Нижний Новгородысь, Пензаысь, Башкириысь, Ульяновск улосысь но мукет азьысь бигер кылъя дышетӥсьес.

«Конкурслэн котькуд тураз быдэн 3 заданиез вал, — шуэ Расиля Габдрахманова. – Туж шуг но тунсыко вал котькудӥз. Пусъеме потэ конкурслэсь берпуметӥ люкетсэ — «Образовательные политики» нимаськись «котырес ӝӧк» сьӧрын вераськонэз. Отчы пыриськиз Тататстанысь калыкез дышетонъя министр Энгель Фаттахов. Жюрилэн ёзчиосыз милесьтым солэн юанъёсызлы валэктон сётыны быгатэммес дунъязы. Озьы ик эскеризы дышетон катъёсты, оценка пуктон кабъёсты, предметмес тодэммес».

Вожвылъяськон бигер кылъя но литературая дышетӥсьлэсь нимзэ, данзэ вылӥе поттон, ӝутон, дышетон амалъёсты вӧлмтон понна ортчытӥське.