«Пус» лаборатория нош ужзэ мытӥз

    «пус» лаборатория нош ужзэ мытӥз 1

    Удмурт кырӟанъёслы клип кылдытонъя «Пус» лаборатория нош ик ужзэ мытӥз. Таяз радэ «Куара» огин проектаз кӧня ке воштӥськонъёс пыртӥз.

    «Пус» лаборатория 2021-тӥ-2022-тӥ аръёсы 4 туала видеоклип кылдытӥз. Вотэсын соосты умой дунъязы. Кылсярысь, post-dukes группалэн «Куно пумитан» кырӟанэзъя пуктэм клипез 52 сюрс 600 пол учкизы ни.

    «Пусчиос» лабораториын басьтэм тодон-валанъёссэс табере мукет ужъёсазы но кутыло, проектэ пыриськемзы сярысь данъяськыса верало. Соин, вылды, «Куара» огин удмурт клипъёсты кылдытонъя «Пус» лабораторилэсь 2-тӥ сезонзэ радъяны малпаз. Малпанзэс быдэстыны Удмуртиысь Экономикая министерство но Президентлэн грантъёсъя фондэз юртто.

    Таяз радэ проект 7 толэзь кыстӥськоз. Со дыр куспын «пусчиос» 3 ӧръёсъя тодон-валан люкалозы: сценарий гожъяны, видеокамераен ужаны, монтаж лэсьтыны дышетскозы. Оштолэзе ортчоз 3 нуналъем интенсив, кытын котькуд клиплы раскадровка (видеолэсь котькуд кадрзэ суредан) дасямын луоз. Собере ини кутскоз тужгес ӟырдыт вакыт: клипъёсты пуктон понна инты быръён, арбери дасян, специалистъёсын кенешон но съёмка радъян. Монтаж  лэсьтэм бере сӥзьыл 3 выль клип возьматэмын луоз.

    Кыӵе кырӟасьёслы шуд усёз «Пус» лабораториен ӵош ужаны но клип кылдытыны? Матысь дыре быръем кырӟанъёс тодмо луозы.