Профессорез Владимир Владыкинэз 75 арес тырмонэныз ӟечкылазы «Удмурт Кенешлэн» Пичи кенешаз
Удмурт калыклэсь дано пизэ котырес лыдпусэныз сӥё-дано ӟечкылазы Ижкарын Калыкъёслэн эшъяськон юртазы «Удмурт Кенеш» огазеяськонлэн Пичи кенешаз.
Владимир Владыкин вордскиз Можга карын, но пичи дырысеныз Кезын улӥз, дышетскиз отысь школаын, собере «витьёсын» йылпумъяз Можгаысь педучилищеез, но Москваысь кун университетэз. Туннэ нуналлы Россиын но кунгож сьӧрын 200-лэсь трос тодосъя ужъёсыз поттэмын. Соос, озьы ик кылбуръёсыз, эссеосыз англи, немец, финн, венгер, эстон но мукет кылъёсы берыктэмын. Ачиз удмурт но ӟуч кылъёсты сяна, англи но немец кылъёсты тодэ.
Солэн верам кылызлэн бадӟым данэз тодосчиос пӧлын но, калыкен кенешонъёсын но.
«Со Москваын но ассэ шедьтысал, мукет бадӟым каръёсын, тодосъя центръёсын, но со вордскем шаераз берытскиз — 70-тӥ аръёс кутсконын тодосъя этнографи школаез улӟытыны, Владимир Емельяновичлэн тыршеменыз Удмурт Элькунын — школаосын, тодосъя институтъёсын, университетъёсын — этнографъёслэн, историкъёслэн, обществоведъёслэн кӧня ке поколениоссы ужало ни», — пусйиз юбилярлэн дышетскисез, истори тодосъя доктор, Кун Думаысь депутат Алексей Загребин.
«Куке монэ журналистъёс кык кылын вераны куризы, кин со Владыкин, мон верай — со океан, тодонлыкен тырмытэм ярдуртэм океан. Преподавательёс трос, дышетӥсь одӥг. <…> Дышетӥсь луыны котькудӥз уг быгаты, нош таӵе дышетӥсез улонын пумитаны — со шуд», — Загребин вераз.
Пумиськонын Владимир Владыкинлы Удмуртилэн тӧроезлэсь но Кун Кенешлэн тӧроезлэсь ӟечкылан но тау карон кылъёссэс шараязы. Трос шуныт кылъёс веразы, азинсконъёс но юн тазалык сӥзизы дышетскисьёсыз, тодос удысысь но мер улонысь ужъюлтошъёсыз.
Вань удмурт калыклэн нимыныз шуыса вераськиз «Удмурт Кенеш» огазеяськонлэн тӧроез, Кун Кенешысь ялан ужась ӧрилэн кивалтӥсез Татьяна Ишматова.
«Котьку но, шорады учкыса, малпасько, таӵе удмурт воргоронмы вань бере — лякыт, визьмо, быгатӥсь, со дыре ик ассэ ноку но уз возьматы, но со сярысь котьку но котькуд егит мурт-а, студент-а, бадӟым мурт-а, дышетӥсь-а, котькытын сое тодо — кызьы меда таӵе адями вордӥськиз шуыса. Тӥ кадь адямиос сярысь шуо: сое, пе, Инмар чупаз вордӥськыкуз. Озьы ик тӥледыз но Инмар чупаз но тӥ вань быгатонлыктэс, вань тазалыктэс но мылкыддэс сётӥзы удмурт калыклы», — Ишматова шуиз.
Владимир Владыкинэн герӟаськем тодэ ваёнъёссэ вераз «Удмурт Кенешлэн» дано президентэз, 90-тӥ аръёс кутсконын Удмуртиысь Вылӥ Кенешлэн тӧроез Валентин Тубылов. Солэн кылъёсызъя, элькунлэсь Кункатсэ, тодмет пусъёссэ кылдытыку Владыкин туж умой, ваньзэ валаса визь-кенеш сётыны быгатӥз. Соку тросэзлы кельшымтэ куншетысь сьӧд буёлэз. Но асьмеос тодӥськом, удмуртъёслэн со буёл музъемез возьматэ шуыса, нош куншетэз юнматыку тросэз сое кайгыронлэн буёлэныз герӟазы. Тодосчи мифологие мур пырытэк, туж огшоры валэктэм: егит пи кышнояськыкуз сьӧд костюм дӥся ук, нош мылкыдыз солэн чик но кайгыр ӧвӧл, дыр.
«Зал соку ик берытскиз, соку ик куара сётӥзы, ваньмыз пӧрмиз. Со одӥг гинэ учыр», — тодаз ваиз Валентин Тубылов но Владимир Емельянович али но сюлэмзэ, вань улонэнзэ удмурт калыклы сётэ шуыса ватсаз.
Владимир Владыкинлы удмурт гуръёсты кузьмазы Вавожысь крезьчиос но Кезысь «Марӟан» ансамбль.
Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/obshchestvo/33808/