Пор калыкез огазеяз «Семык»

Кутскиз Семык Варали гурт дорысь кызьпу арамаын вӧсяськонэн. Та нуналэ ик пор эктонъёсъя мастер-класс но этнодискотека ортчиз. Со понна .юри Марий Элысь ӧтемын вал тодмо артистъёс – Сергей Пакеев но Раиса Данилова.

Делегациослэн яркыт парадэнызы усьтӥськиз Семыклэн кыкетӥ нуналэз. Элькун шулдыръяськонэ вуизы муниципал кылдытэтъёсысь, Марий Элысь, Татарстанысь, Киров улосысь куноос.

Валтӥсь сцена вылын Семыкез сӥе-дано усьтӥз Удмурт Элькунлэн Йырыз Александр Соловьёв. «Мон туж шумпотӥсько, туэ Семык мынам вордскем музъем вылам , Алнаш ёросын , ортче шуыса»,- пусйиз со но тау каремзэ вераз аспалъёсызлы , музъем бордын, гурт возёсъёсын ужасьёслы.

Семык – пор калыклэн тужгес сӥлы карон йылолэз, вашкала ӵыжы-выжыоссэс буре ваёнъёс пӧлы пыре . Праздниклэн концепцияз туэ нимысьтыз саклык висъяськиз пор калыклэн пӧйшуран йылолъёсызлы, Семыкез усьтонлы юри дасямын вал « Годыр кутон»композиция .

Дуно куноос пӧлын Семыкын шулдыръяськизы Удмурт Элькунлэн Йырызлэн но Кивалтэтлэн Администрацизылэн тӧроез Андрей Гальцин, туризмъя но лулчеберетъя министр Владимир Соловьёв, йӧскалык политикая министр Лариса Буранова, Калыкъёслэн Эшъяськон юртсылэн кивалтӥсез Татьяна Боталова но мукетъёсыз.

Воргоронъёс куспын «МАРИЙ ПАТЫР» , нош нылкышноос куспын «УСТА ПАМПАЛЧЕ» нимо ӵошатсконъёс ортчизы, ужазы элькунысьтымы усточиослэн киужъёсынызы адӟытон но пӧртэм площадкаос.

Элькун шулдыръяськон чотын Семык кызь одигетӥ арзэ радъяськиз. Пусйыны кулэ, Алнаш ёросын со ньылетӥзэ ортчиз ини. Вуоно арын Семыкез пумиталоз Грак ёрос.