Пиналъёслэн выжыкылъёсынызы «ДондыДор батыръёс» бичет потӥз Глаз ёросын
Ёросын «ДондыДор – родина удмуртских батыров» вожвылъяськон ялэмын вал. Ӵапак со конкурсэ пыриськем пиналъёслэн устоосыз ужъёссы «ДондыДор батыръёс» бичетэ шедизы.
«Суредъёс, выжыкылъёс, легендаос корка кузё сярысь но, нюлэсмурт сярысь но. Озьыен, мар ке соослэн йыразы лыктӥз, мае ке лыдӟизы, песянайёссылэн верамзыя гожъязы. Собере ми выжыкылъёслы тупась суредъёсты пуктылӥм», — Ольга Шиляева, Глаз ёрос лыдӟетъюртысь библиотекарь.
Ӧнерчи верамъя, вожвылъяськонэ ёросысь вань школаосысь дышетскисьёс пыриськизы. Тужгес трос ужъёс Шӧмпи гуртысь вуизы. Ваньмыз книгае ог 40 пала устоосыз ужъёс пыризы.
Пусъём, «ДондыДор батыръёс» бичет 62 экземплярен потӥз. Книгаосты матысь дыре ёросысь лыдӟетъюртъёсы келялозы.
Тодэ вайытом, туэ куарусёнэ Глаз ёрос лыдӟетъюрт Адам гуртысь пиналъёсын ӵош кылдытэм удмурт батыръёс сярысь «Утэмкар» мультфильменыз тодматӥз.