Пичи Пургаысь «кенешчиос» удмурт кыллэсь кутӥськон удыссэ паськытатыны малпало

Пичи Пурга ёросысь «Удмурт кенеш» огазеяськонлэн ёзчиосыз Правленизылэсь паськытатэм кенешсэс радъязы

Ёросысь кенешчиос сяна, Баграш-Биграе вуылӥзы Вань удмуртъёслэн XIV Ӧтчамзылэн делегатъёсыз, ёрос тӧролэн мерлыко ужпумъёсъя воштӥсез Оксана Дерендяева но ёрос лыдӟиськон юртлэн кивалтӥсез Оксана Серебрякова. Нимысьтыз ӧтемын вал удмурт гуртъёсысь егит ӧнерчиос но муниципал кылдытэтъёслэн кивалтӥсьёссы.

XIV Ӧтчамын эскерем ужпумъёсын тодматӥзы делегатъёс Ольга Туктарева, Михаил Возняков, Екатерина Гагарина, Николай Зайцев, Зинаида Елизарова, Надежда Степанова.

Правленилэн ёзчиосыз дэмлазы таяз арын валтӥсь ӧръёсъя ужаны, нимысьтыз саклык висъяны гуртъёсын бӧлякез азинтонлы но удмурт кыллэсь кутӥськон удыссэ паськытатонлы.

Кызьы ужало Баграш-Бигралась азьветлӥсьёс Бигра воршудъёсты, выжыосты эскеронъя — тодматӥз Пичи Кенешлэн ёзчиез Владимир Ботников. Люкаськемъёс озьы ик «Даур шыкыс» гурт музеен тодматскизы.

Удмурт кыллэсь кутӥськон удыссэ паськытатон дэмланъёсын резолюция бордын али нимысьтыз группа ужа. Озьы ик кенешемын матысь дыре шаерез тодонъя ӧнерчиослэсь семинарзэс радъяны но удмурт егитъёслэсь форумзэс ортчытыны.

ивортон кутэмын «Удмурт Кенешлэн» Пичи Пурга ёросысь ёзэтэзлэн огинысьтыз