Пичи Пургаын ортчиз 20-тӥез «Герд лыдӟонъёс» элькун конференци

    Пичи пургаын ортчиз 20-тӥез «герд лыдӟонъёс» элькун конференци 1

    Ужрадлэн ужпумъёсыз — Гердлэсь улонзэ но творчествозэ эскеронэз азьланьтон но туала улонын кылэз выльдон. Озьы ик конференци улсын Кузебай Герд нимо йӧскалык премилэсь выль лауреатъёссэ сӥлы каризы.
     
    «Герд лыдӟонъёс» «Гердлэн дуннеосыз — гурт — кар – кыл – революция» ним улсын ортчиз. Саклык висъямын вал Гердлэн удмуртлыкмес утёнлы, удмурт кылэ выль кылъёсты пыртон сярысь гожъямъёсызлы. Соин но ужрад нырысьсэ быдэсак ортчиз удмурт кылын.
    «Удмурт кылэз таӵе бадӟым форумъёсын кутон сярысь малпаське вал Герд, — шуэ кылосбур тодосъя кандидат Александр Шкляев. — Солэн малпанъёсыз трос эскеремын но улонэ ваньмыз пыремын ӧвӧл на. Но каллен-каллен соосты пыртӥськом ини».
     
    Та ужпум быдэстонтэм овол, огкылэ вуизы конференцие люкаськем делегатъёс. Но со понна котькудиз удмурт адями асваланзэ будэтыны кулэ. Та пумысен яркыт примеръёс луо.
     
    Конференциын Кузебай Герд нимо йӧскалык премиен пусъён ортчиз. «Удмурт кенешлэн» исполкомез юнматӥз та премиез 1992-тӥ арын. Со арлы быдэ сётъяське. Туэ пусйемъёс пӧлын Пичи Пурга черкогуртысь удмурт дэремъёсты вылдӥсь, модельер Татьяна Москвина но «Удмурт Кенеш» огазеяськонлэн Пичи Пурга ёзэныз кивалтӥсь Василий Москвин.
     
    Озьы ик премиен пусйемын Можга карысь «Марӟан» ансамбльлэн кивалтӥсез, крезьгурчи Вячеслав Кудрявцев.
     
    Кыкетӥзэ премиен пусйиське кунгож сьӧрысь тодосчи. Нырысетӥез вал Петер Домокош, туэ та дано ним сётэмын эстон тодосчилы, кылысь кылэ берыктӥсьлы но гожъясьлы Арво Валтонлы.
     
    «Арво Валтон — со быдэс дуннеын тодмо гожъясьись, мерлыко ужась, — вера филологи тодосъя кандидат Алексей Арзамазов. — Берло аръёссэ удмуртъёс понна туж трос лэсьтӥз. Удмуртъёс сярысь со котьку но бурдъяськыса вера, удмурт калыклэн вуоноез сярысь сюлмаське».
    Вуоно арын «Герд лыдӟонъёс» элькун конференци ортчоз Вавож ёросын. Кайта со сӥземын луоз Гердлэн вордӥськемез дырысен 120 ар тырмонлы но радъямын луоз солэн вордӥськем палъёсаз.