Пичи Пурга ёросысь котькуд муниципал кылдытэтын экскурсиосъя маршрут кылдыны кулэ

«Жаляса верано, ми ум тодӥське ёросмес, асьме покчи вордскем шаермес. Котькудӥз аслаз гуртаз улэ, аслаз черкогуртаз. Кылсярысь, улӥськом Норьяын, нош мар со Вуж Мӧнья, кыӵе отын объектъёс, тунсыко интыос — сое ум тодӥське. Соин ик, ёросмес тодон понна таӵе конкурс ялӥмы», — Пичи Пурга ёрос лыдӟетъюртысь ӧнерчи Валентина Петрова вераз.

Солэн кылъёсызъя, вожвылъяськонэ вань мылкыд карисьёс пыриськыны быгато. Нырысь ик гурт поселенилэн историезъя, тунсыко интыосызъя но сям-йылолъёсызъя, отысь тодмо адямиосъя эскерон уж лэсьтыны кулэ. Собере бичам ивортодэт вылын экскурсиосъя маршрут кылдытоно но дышетскисьёс яке шаертодӥсьёс пӧлысь экскурсоводъёсты дасяно. Дась маршрутъя мукет школаосысь пиналъёс, мукет муниципал кылдытэтъёсысь вань мылкыд карисьёс понна экскурсия ортчытӥськоз.

«Отчы пыре, валамон, черк. Собере Норъяе пырон азьын вань тунсыко арт-объект, шуом <…> — пулэсь вуко, кышномурт озьы ик пулэсь. Со Норья выжылэн анаез. Собере Норья вӧзын вань Улынгурт, отын 2015-тӥ арысен «Тропа охотника Пужея» маршрут ужа. Со но пыре туризмъя маршрутэ. Школаысь музее ветлыны луэ, отын озьы ик тунсыко арбериос люкамын. Собере отын вань вӧсям ошмес, отын вань часовенкаез», — пусйиз Валентина Петрова.

Конкурсэз радъясь пусйиз, экскурсиосъя маршрутъёс кылдытон сяна, та ужрадлэн эшшо кык валтӥсь йылпумъянэз луоз на: пиналъёслэн эскерон ужъёсынызы электрон лыдӟетъюрт но лулчеберетъя луонлыкъёсын электрон карта.

Ватсалом, конкурслэн вормисез маршрутсэ азинтонлы 20 сюрс манет утоз. Озьы ик коньдонкузьымен школаысь куинь устооссэ адӟытонъёсты пусъёзы.

Ивортодэтъя «Удмуртия» агентстволэн сайтысьыз басьтэмын: https://udmurt.media/udm/news/kultura-i-turizm/32993/