Пичи Пурга ёросысь биграос Вань удмурт воршудъёслэн ыстэм муртъёссылэн люкаськоназы пыриськозы
«Соослэн вань туж мыло-кыдо адямиоссы со Баграш-Бигра гуртын, соослэн туннэ нуналлы вить-а, мар-а бӧлякъёссы люкамын ни. Соос пуссэс утчало асьсэлэсь, (куд-огезлэн — ред.) пусъёссы шедьтэмын ни. Биграос али вожмаськыса кадь со бордын ужало. Мукет ласянь, ведь со семьяез люкан. Улонъя ведь валано, «поддержка рода» шуо, со но туж кулэ адямилы ас улоназ — выжызэ тодон», — вера Надежда Степанова, Пичи Пурга ёрос администрациысь Лулчеберетъя но туризмъя управленилэн кивалтӥсез.
Бигра воршудлы тупась дӥськутъёс дасяз Пичи Пурга ёросысь калык дэремъёсты вурись Татьяна Москвина. Со сяна, делегацие лыдӟетъюръёсын, клубъёсын ужасьёс но пыриськозы.
«Милям ужпуммы учкыны, кызьы радъяло глазкаръёс. Соос тӥни воршудъёс бордысен кутскизы, нош милям бӧлякъёсты вӧлмытэммы потэ. <…> Сояз арын милям луоз 90 ар ёросмылы, ортчытыны ӧдъяськом, вӧлмытыны соослэсь ужан амалъёссэс — кызьы соосты огазеяны луоно, кыӵе пусъёс вал, кылсярысь, оглом, мар со сыӵе бӧляк. Со движениез милям вӧлмытэммы потэ гуртъёсамы, ну и дась люкиськыны со ужан амалъёсынызы вань мылкыд карисьёсын», — шуэ Надежда Степанова.
Солэн верамезъя, ёросын улӥсьёс пӧлысь 80 процентэз удмуртъёс луо бере, Лулчеберетъя но туризмъя управление калыклэсь вашкала сямъёссэс утёнъя но вӧлмытонъя нимысьтыз программа дасяны малпа. Со улсын 31-тӥ гудырикошконэ «Яган-Базар» шулдыръяськонын семинар ортчытыны чаклало.