Пичи Пурга ёросысь «Арганчи» калык ансамбльлэн кивалтӥсез кун кивалтэтлэн «Душа России» премиезлэн лауреатэз луиз
Татьяна Михайлова «Калык крезьгур» номинациын пусъемын. Кызьы вераз «Арганчилэн» кивалтӥсез, премия сярысь со куарусён кутсконын тодӥз. Вормисьёс пӧлы шедемез пумысен мылкыдзэ вераны али ке но шугъяське.
«Может тани Москваысен, Москваысь бертӥм ке, куке киын луоз ни, соку валалом. Москвае мыном шуыса, конечно, туж коллективе шумпотӥз. Кыдёке потыны тазалыкъёссы ӧвӧл ни, малы ке шуоно мӧйыгес ни, 60 арес, 60-лэсь но бадӟымъёсыз вань коллективын. Соослы секытгес ни. Но Москвае потэм потэ, шуо вал соос», — ивортӥз ансамбльлэн кивалтӥсез.
Та дыре «Арганчи» данъян ужрадлы дасяське. Со шоркарын толсуре ортчоз. Москвае артистъёс 10 кузя мынозы — ялан шудӥсьёс но Ижкарын улӥсь егит арганчиос.
«Ми потом эстон гуръёсъя попурриен. Кытӥ ке но шудом гинэ, кытӥ ке но кырӟалом но, кытӥ эктом но» — шуиз Татьяна Михайлова.
«Душа России» премия Удмуртиысь ансамбльлэн кивалтӥсезлы сётӥське. Озьы ке но, Татьяна Михайлова сое коллективлэн ужаз кутыны малпа, кылсярысь, Москвае данъет сётон ужрадэ мынон понна билет дунэз берыктыны, азьланяз фестивальёсы ветлыны, дуннеез адӟыны но калыкен тодматскыны.
«Премия кивалтӥсьлы сётӥське, но мон сое озьы кутыны уг быгатӥськы. Кызьы-о шуод ай, ӟуч сямен, совесть уз тырмы. Мынам со премиялы коллективе больше достоин кадь потӥсько. Мон зарплата басьтыса ужасько но соослы туж тау шуисько, соос ветло, дурбасьто шуыса. Вот мыным уж инты вань. Нош соос уксё басьтытэк ветло. Мед шумпотозы, кытчы ке потыны со уксёен ми быгатӥм ке, — шуэ Татьяна Михайлова.
Ватсалом, Бобья-Учаысь «Арганчи» калык ансамбль кайта 30 арзэ пусъёз. Коллектив пӧртэм калыккуспо, огъяросси но улосвыл вожвылъяськонъёсы пыриськылэ но лауреат луылэ. Ансамбльын 6–7 адями ялан шудэ, куд-ог ужрадъёсын бордазы итӥськыло Ижкаре кошкем 3–4 егит арганчиос. Со сяна, али Татьяна Михайлова школаын дышетскись нылашъёсты шудыны дышетэ, «Арганчи» коллективе дася.