Пичи Пурга ёросын «Этноковоркинг Пурга татын» проект йылпумъяськиз.
Удмуртлыклы дышетскон шормуӵ «Пурга татын!» – нимало проектсэс сое радъясьёс, Пичи Пурга ёросысь лыдӟиськон юртысь ӧнерчиос. Кылем тулыс соос Лулчеберет удысысь кичӧлтонъёсты азинтонъя Президент Фондлэсь грантсэ утӥзы.
Проект чотын лыдӟиськон юртлэн нырысетӥ этажаз удмуртлыклы дышетскон шормуӵ – этноковоркинг – зона кылдытӥзы. Одӥгзэ залзэс тупатъязы, выльдӥзы, басьтӥзы ноутбук, проектор, оборудование. Залазы лэсьтытӥзы удмурт шобретъёсын ӟусъес, тангыра, вашкала пукон.
Пичи Пурга ёросысь бадӟым классъёсын дышетскись пиналъёс понна радъямын вал 4 этномастерскойес: этнокрезьгуръя, этномодая, удмурт литературая, театръя. Соосын ужазы элькунамы тодмо луэм аспалъёссы – кылбурчи Богдан Анфиногенов, «Кенеш» журналлэн редакторез Анастасия Шумилова, кырӟась Эдуард Мираев, Удмурт йоскалык театрысь актёр Вадим Дмитриев. Этномастерскойесын оглом вераса 120 пинал быгатонлыкъёссэ азинтӥз.
30 пинал дышетскиз этноволотёр луыны – удмурт кылын сценарий гожтыны, ужрад ортчытыны, экскурсиос нуыны, видео снимать но монтировать карыны. Этноволонтеръёсын ӵош проект чотын лэьтӥзы Пичи Пурга черкогуртлэн историезъя удмурт кылын 7 видеороликъёс.
Удмурт кылэз интернетын волмытон, егит калыклы вордскем гуртсэ яратон мылкыд пыӵатон вылысь «Маяк» ёрос газетэн ӵош радъязы «Пурга –татын» шаертодон ивор гожтонъя вожвылъяськон. 25 егит мурт мылкыд кариз пыриськыны, удмурт но ӟуч кылын мерлыко вотэсэ пост гожтӥз.
3 команда – удмурт кылъя дышетӥсьес, ёросысьтызы но Татарстанысь Агрыз ёросысь «Удмурт Кенеш» азьветлӥсьёс, Пичи Пурга гимназиысь дышетскисъёс ужазы «Кыл-хакатон: Удмурт-а тон» модельной семинарын. Вакчи дыр куспын кылдӥзы 3 выль проект ӵектосъёс.
Егитъёсын ужан радэ выль амалъёс пыртыны юрттӥзы егитъёслэн «Куара» огазеяськонзылэн кивалтӥсез, видеограф Влад Степанов но «Артэ» мерлыко огазеяськонлэн тӧроез Юлия Шахтина. Семинаръёсын соос тодон-валан сётӥзы лучеберет но дышетон удысысь ӧнерчиослы. Лулчеберет ужрадъёсъя Удмурт марафон мерлыко вотэсын огазеяз удмурт кылын, удмурт шӧмо 13 выль ужрадэз.
– Учконо ке, лыдпусъёс, оло, бадӟым но ӧвӧл. Но соос сьӧрын – проектлэн командаезлэн бадӟым ужез но проектэ пыриськемъёслэн бадӟым мылкыдзы. Тау ваньмызлы, кинэн ӵош удмуртлыко малпанъёсмы улонэ пыӵазы, – пусйиз проектлэн кивалтӥсез, Пичи Пурга ёросысь «Удмурт Кенеш» огазеяськонлэн кивалтӥсез Надежда Степанова.