Пичи Пурга ёрос литературалы сӥземын луоз 2019-тӥ ар Удмуртиын
Удмуртиын Можга ёрос литературалэсь нуналъёссэ сӥё-дано ворсан Кватчи гуртын 20-тӥ толсуре ортчиз. Людмила Шумиловалэн кылъёсызъя, эстафетаез кутон соос понна шуак луиз, малы ке шуоно радъясьёс та иворез ӧз шараялэ вал. Озьы ке но пургаос чик но уг кышкало, малы ке шуоно ёрос литература калыклы возьматымон луэ.
«Удмурт литератураез пургаос асьсэ вакытэ туж ӝутэмын. Может, туж пыдлось классикъёсмы ӧвӧл, но милям вань соцреализмлэн классикъёсыз. Самсоновъёслэн династизы, соос туж трос лэсьтӥзы. Вань классикъёс, кудъёсыз туннэ ужало – Анатолий Перевозчиков, Любовь Тихонова. Вань туж трос пинал гожъясьёсмы. Шумпотӥськом, туннэ книгаосмы пото Богдан Анфиногеновлэн, Анастасия Шумиловалэн.Толон гинэ Маша Векшиналэн книгаезлэн презентациез ортчиз. Елена Миннигараева поттэ книгаоссэ. Озьыен, милям вань, мар сярысь вераны», — шуэ Пичи Пурга ёрос лыдӟетъюртлэн кивалтӥсез Людмила Шумилова.
Пичи Пурга ёрос литературалэн нуналъёсыз муниципалитетлы 90 ар тырмон аре тупазы. Юбилей улсын чаклам ужрадъёс литература нуналъёслэн ӧраз пырозы, лыдъя Людмила Шумилова. Вуоно арын одно ик ортчоно ужрадъёс пӧлын: Литературая музейёслэн элькун форумзы, бард кырӟанъя «ТылоБурдо» фестиваль, лыдӟиськонъя «Пурга читающая» ёрос фестиваль, егит гожъясьёслы литературая десант. Со сяна, литературая «Пичи Пурга – бадӟым сюлэм» ёрос конкурсэ вуэм ужъёсын пӧртэм жанръёсын бичет поттыны чаклало.
Кызьы вераз Людмила Шумилова, Пичи Пурга ёрос литературалэсь нуналъёссэ радъян ласянь муниципалитет Йӧскалык лыдӟетъюртэн огкылысь ужалоз. Ӵектосэз улонэ пыӵатӥсьёслэсь дэмланъёссэс лыдэ басьтыса, ужрадъёс узыр пуштросо пӧрмыны кулэ.
Тодэ вайытом, Удмуртиысь йӧскалык лыдӟетъюртлэсь «Удмурт Элькунысь муниципал кылдытэтъёслэн литературазылэн нуналъёссы» ӵектоссэ 2017-тӥ арын Алнаш ёрослэн литератураеныз кутскизы. Ар ӵоже со улсын пӧртэм ужрадъёс ортчизы. 2018-тӥ арын проектэз Можга ёрос азьланьтӥз.
Ватсалом, 20-толсуре Ижкарын Пичи Пурга ёросын вордскем гожъясьлэн Мария Векшиналэн нырысетӥ книгаеныз тодматон ӝыт ортчиз.