Пичи Пурга ёрос литературалэсь нуналъёссэ сӥё-дано усьтӥзы Удмуртиын

Ужрадын гожъясьёс но кылбурчиос асьсэлэсь ужъёссэс лыдӟизы, озьы ик куноос асьсэлы кельшымон ужъёсты быдэстӥзы. Со сяна, ёросысь коллективъёс, пиналъёс кырӟанъёсын шулдыртӥзы. Татьяна Москвина удмурт дэремъёссэ возьматӥз.

Пичи Пурга ёросысь потэм гожъясьёслэн творчествозы, соослэн удмурт литератураын интызы сярысь ивортон лэсьтӥз Удмурт кун университетысь Удмурт кылосбуръя, финно-угроведениея но журналистикая институтлэн кивалтӥсез, кылосбур тодосъя доктор Наталья Кондратьева.

Ёросысь Тыло гуртэз быдэс элькунысь тужгес литературной гуртэн ниманы луоз. Отысь куать тодмо гожъясьёс потӥзы, витез со пӧлысь Россиысь Гожъясьёслэн огазеяськонзылэн ёзчиосыз. Семён Самсоновен кутскем сюрестӥ солэн матысь ӵыжы-выжыосыз но мынӥзы.

Пичи Пурга ёросысь авторъёс пӧртэм арлыдъем лыдӟисьёслы гожъяло. Нылпиос нырысь ик тодматско Андрей Самсоновлэн, Владимир Самсоновлэн, Надежда Лопатиналэн ужъёсынызы. Быдэ вуымтэослы тунсыко луозы Владимир Голубевлэн Быдӟым ожлы но отысь батыръёслы сӥзем произведениосыз. Туала егитъёслэсь улонзэс Елена Миннигараева но Мария Векшина возьмато. Нош Кирилл Ломагинлэн но Александр Титовлэн сатира ӧрын гожтонъёссы туннэ но лэчытсэс ӧз ыштэ.

Кылбурез гажасьёслы тодмо луо Любовь Тихонова, Оксана Бисар, Семён Карпов, Владимира Возняков, Георгий Архипов, Виктор Ивашкин, Илья Пельтемов, Василий Михайлов но мукетъёсыз.

Тодэ вайытом, муниципал кылдытэтъёслэсь литература аръёссэс Удмуртиын ортчытъяны кичӧлтон сётӥз элькунысь Йӧскалык лыдӟетъюрт. Валля но кылем аръёсы Алнаш но Можга ёросъёсысь гожъясьёслы сӥзем ужрадъёс ортчизы ни. Кызьы вераз лыдӟиськоннилэн кивалтӥсез Татьяна Тенсина, соослэн потэ, ӵектос улсын выль нимъёс мед усьтӥськозы, литературая премиос, буре ваён пулъёс мед кылдозы, лыдӟиськонниослы Удмуртиысь тодмо гожъясьёслэсь нимъёссэс мед сётозы шуыса.

Поделитесь с друзьями:

Журналист, редактор сайта, руководитель и куратор медийных проектов, продюсер и ведущий интернет-телеканала "Даур ТВ"

Дом Дружбы народов
Добавить комментарий