«Пичи чеберайёс но батыръёс» конкурслэн ёрос люкетъёсыз ортчизы

    «пичи чеберайёс но батыръёс» конкурслэн ёрос люкетъёсыз ортчизы 1

    Удмурт нылпиослы таӵе вожвылъяськон 6-тӥ арзэ радъя ни «Удмурт нылкышно кенеш» огазеяськон «Удмурт кенешен» но Йӧскалык политикая министерствоен валче. Азьвыл со чакламын вал Ижкарысь удмурт семьяосысь нылпиос понна гинэ. Кылдытӥз сое «Удмурт нылкышно кенеш» К. Герд нимо гимназиысь удмурт кылъя дышетӥсьёслэн «Зарни бугор» клубенызы ӵош. Но берло ужрад бурд улаз бичаз ёросъёсты но.

    Арысь аре фестиваль паськыта, туэ отчы пыриськизы шаерысьтымы 20 ёросъёс. Палэнэ кылизы удмурт кылэз чик дышетӥсьтэмъёсыз гинэ — Камбарка, Каракулино, Сюмси…

    — Фестивальлэн кулэлыкез бадӟым, со кырӟан-веран понна гинэ малпамын ӧвӧл, — вера «Удмурт нылкышно кенешлэн» кивалтӥсез Надежда Степанова. — Сӥземын анай кылэз гажан, яратон мылкыд пыӵатонлы. пинал удмурт сямен мед вераськоз. Фестивальлэсь пайдазэ пусъё анай-атайёс. Нылпиос но ужрадлэн кельшемез сярысь верало.

    Туж шумпотӥськом, туэ ёросъёс туж мыло-кыдо басьтӥськизы фестивалез ортчытон борды. Кылсярысь, Можга карын ужрад 2 нунал кыстӥськиз — угось трос нылпиос быгатонлыкъёссэс возьматыны мылкыд каризы. 3 площадка ужаз Ижын, пыриськизы вань ёросъёс. Городысь быръемын тужгес устоосыз 3 батыр но 3 чеберай. Та сяна, туэ нимысьтыз «Покчи кылчи» нимын пусйимы удмурт кылын вераськись 7 нылпиосты, соос ӧтемын фестивальлэн финалаз.

    Ужрадлэн пуштросэз паськыт: нылпиос анай кылынызы асьсэ сярысь веразы, удмурт кылбуръёс лыдӟизы, кырӟазы, эктӥзы. Нылашъёс киужен вырыны быгатэмзэс, пияшъёс кужмо, шӧртчи луэмзэс возьматӥзы.

    Фестивале пыриськем вань нылпиосты быгатонлыкъёссы, мылкыдзы понна вормисьёс шуимы. Азьланяз но ужрадъёсы кыстӥськемзы мед потоз шуыса, котькудӥз пӧртэм номинациосын пусъемын — «Мусокай», «Усточи», «Визь пог», «Шӧртчи» но мукет.

    Туэ нырысьсэ куримы ёросъёсысь тужгес устооссэ нылпиосты асьсэ сярысь видео гожтыны. Соос ваньмыз поттэмын луозы «Удмурт нылкышно кенешлэн» «ВКонтакте» группаяз. Нош финалын возьматэмын луозы нылпиослэн тужгес устоосыз номеръёссы. Быдэс ужрад ортчоз шудон амалэн.