Пересен-пиналэн, тупен-чапен
Фестивальлэн пусэз — Пурга минё (ёросын мунёез озьы шуо) — огаз гурт поселениысь мукетаз «ветлэ». Муниципал кылдытэтъёс, мунёез ог-огзылы сётыку, пӧртэм ужрадъёс ортчытъяло. Озьы Уром муниципал кылдытэтэ пырись Гожня гуртын радъяськиз «Тупен-чапен» фестиваль.
Ужрад огазеяз пӧртэм гуртын улӥсьёсты. Уром муниципал кылдытэт ёросын тужгес бадӟымез луэ — татчы 18 гурт пыре. Котькуд гуртын сямен асьсэлэн кырӟась-верась коллективъёссы вань: Гожнялан — «Гожна кенакъёс», Эгралан — «Мылкыд», Уромын — «Кырӟась сюлэмъёс» но «Ивушки». Та коллективъёс ик пумитазы куноосты — кырӟаса-вераса, перепечен утялтыса.
Уром гурт поселенилэн йырыз Пётр Коровин котьку но сюлмаське спортэз азинтыны. Соин ужрадын пӧртэм пумо ӵошатсконъёс радъямын вал: кин ке футболэн шудӥз, мукетыз бызьылӥз, куинетӥосыз гозы кысказы.
Нош тужгес трос калыкез огазеяз тупен-чапен (лаптаен) шудон. Командаос люкаськизы Гожня, Баграш-Бигра, Кечол, Аксакшур, Постол гуртъёсысь. Шудӥсьёслы тупен-чапенлэсь куронъёссэ валэктӥз Уромысь физкультуралы азьвыл дышетӥсь Иван Ожмегов.
Азьло туплы шуыса ыж гонэз гындо вылэм. Нош та шарез шуккыны нимысьтыз боды (бита) кулэ, со интые туж тупа вылэм чапа — ошмес дурын тусьын дӥсь миськисьёс таӵе чапаен (пальчаен) дӥсьсэс кокало вал. Тупен-чапен шудыса будэмын тросэз гуртоос. Али но школаосын та шудонэз уг вунэто. Соин но, дыр, тупен-чапен шудонзы туж усто пӧрмиз.
Тупез кабыса, бызьылӥзы удмурт дэремен пӧрмытскем кенакъёс но, пиналъёс но, пиосъёс но. Куноосты пумитась Гожня гурт тупен-чапен шудыны туж зол дасяськем — татысь команда вормонэз нокинлы ӧз сёты.
Кин ӵошатскыны ӧз мыны — соослы но фестивальын мӧзмыт ӧз поты. Нылпиос шудӥзы «Кӧжыпог» площадкаын. Лыдӟиськыны яратӥсьёс вамыштӥзы литературалы сӥзем азбаре. Киуж ужасьёс но суредасьёс усьтӥзы асьсэлэсь площадкаоссэс. Гурт поселениысь ошмесъёслы сӥзем сэрег но буш ӧз улы — 5 гуртысь ошмес вуэз веръяны но ӵошатыны калык люкаськиз.
Та нуналэ фестивальысь одӥг куно но кузьымтэк ӧз кошкы. Бызьылэм-ӵошатскемез бере калык ӝук сииз, концерт учкиз. Нош Пурга минё сюрессэ азьланьтӥз — табере со Аксакшур гурт поселениын бергалоз.