Пельняньлы сӥзем фестивальын 7 тонна пельнянь сиемын
9-тӥ феврале Ижысь шор площадьын пӧртэм мастер-классъёс, конкурсъёс, шудонъёс, спорт вожвылъяськонъёс ортчизы, чузъяськизы кырӟанъёс, вуз каризы киужъёсын, пельнянен.
Ижкарын улӥсьёсты но куноосты бадӟым сцена вылысен ӟечкылаз Удмурт Правительстволэн Тӧроез Ярослав Семёнов:
— Ми 5-тӥ арзэ та бадӟым праздникез ортчытӥськом ни. Арысь аре со паськыта, отчы тросгес калык пыриське. Пельнянез табере семья куспын кухняын гинэ уг куто ни. Сое пӧрало школаосын, нылпи садъёсын, ӵош ужась эшъёсын валче. Оскисько, фестиваль вань калыкмес огазеяса, шаермес азинтыны юрттоз.
Ужрадъёс дыръя Богдан Анфиноген кырӟам улсын 100-лэсь трос адями эктонъя флеш-мобе пыриськиз. Калыкез шулдыртӥзы «Италмас», «Шулдыр ӝыт», «Ӟардон», «Айкай» ансамбльёс, Брангуртысь песянайёс.
Шор карлудын пӧсь вал вожвылъяськонъёслэсь но. Вань мылкыд карисьёс понна ортчизы «Тупен шудон», «Кукей бичаса», «Пельнянькей» шудонъёс. Кырӟаны быгатӥсьёс «Рэпушки» конкурсын нюръяськизы — такмакъёс быдэстӥзы. Пельнянь кутӥсь ужбергатӥсьёс куспын ческытсэ сиён лэсьтӥсь предприятиез бырйизы но «Зарни пельнянь» премиен пусйизы. Ужрадэз йылпумъяса, калык пӧлын быдэс арлы тырмымон пельнянь но пызь шудытӥзы.