«Пельняньлэн дунневыл нуналэз» фестивальлэсь мынэмзэ адӟозы Финляндиын

Финляндиысь мылкыд карисьёс фестивальлэсь сӥё-дано усьтонзэ, валтӥсь ужрадъёсты бадӟым экран вылысь учкыны быгатозы. Со сяна, финнъёс понна ас шаеразы пельнянь кутонъя, табань пыжонъя мастер-классъёс, пельнянен тунаськонъёс, калык шудонъёс радъямын луозы.

Удмуртиын пельняньлы сӥзем фестиваль туэ 3-тӥзэ ортчоз ни. Со «Удмуртия — пельяньлэн вордскем интыез» брендэз азинтон улсын радъяське. Быдэс дуннелы тодмо сиёнэз асьсэлэн шуэмзы потэ трос пӧртэм калыкъёслэн. Но тодосчиослэн эскеронъёссы возмато, пельнянь «пель» но «нянь» кылъёслэсь кылдэмын. Со — удмуртъёслэн сиёнзы.

Туэ но фестиваль улсын мастер-классъёсы пыриськыны, пельняньлэн историеныз тодматскыны, соин герӟаськем йылолъёсты тодыны луоз. Нош йылпумъяськоз ужрад 11-тӥ тулыспалэ Ижкарысь Шор площадьын бадӟым но яркыт праздникен.