«Пельняньлэн дунневыл нуналэз» фестиваль рекордъёсъя Гиннеслэн Книгаяз пырыны дасяське

«Пельняньлэн дунневыл нуналэз» Удмуртилэн пӧртэм сэрегъёсаз 2 арня ӵоже ортче. Туэ со 11-тӥ тулыспалэ кутске.

«Али валтӥсь ужпуммы милям рекорд вылэ потыны, шуэ — Йӧскалык политикая министерствоысь валтӥсь ӧнерчи Елизавета Ложкина. — Кылем арын 30 тонна пельнянь сиемын но басьтэмын ке вал, туэ тросгес лыдпусэ потыны малпаськом. Но лыдэ басьтэмын луоз пельнянь сием гинэ, басьтэмзэ ум эскере ни. Лыктозы юри ӧтем адямиос, кудъёсыз лыдъялозы но ваньзэ гожтозы. Потыны малпаськомы калыккуспо рекордэ. Туэ ӧтенъес келямын ини Китае но».

2015-тӥ арын «Удмуртия — родина пельменей» ним улын ортчытэмын вал нырысетӥез фестиваль. Соку ик валамон луиз, пельнянь Удмуртилэн выль брендэз луыны бугатоз шуыса.

Кылем арын «Пельнянь шудонъёсы» пӧртэм ёросъёсысь 16 командаос пыриськизы. Туэ 25 командаослэн куриськонъёссы вуизы ини. Озьы ик вазиськонъёссэс возьмало асьсэ ужзэс возьматыны мылкыд карисьёслэсь но. Фестиваль улсын возьматон-вузкарон радъямын луоз.