«Пельняньлэн дунневыл нуналэз» фестивальлы кутскон сётэмын

Ужрад аспӧртэмлыко вожвылъяськон бордысен кутскиз. Татчы вуэмъёс нырысь ик пельнянь кутӥзы. Кин ке ӝоглыкъя висъяськиз, мукетыз — ӟечлыкезъя, куинетӥез — чеберлыкезъя. Нош огъя вераса, эшъяськон вормиз. Собере ини фестиваль сярысь вераськон ӧръяськиз. Ӧнерчиос азязы ужпум пуктӥзы — котькуд фестивальлэн аслаз «ымнырыз» луыны кулэ. Миым со тол шудонъёсын герӟаськемын ке вал, туэлы — выль малпан.
 
«Туэ ми пуктӥськом рекорд, — шуиз Удмуртиысь йӧскалык политикая министр Лариса Буранова. – Фестивале лыктоз нимысьтыз рекордъёсты пусъись огазеяськон. 11-тӥ тулыспалэ Ижкарысь Шор площадьын сием пельняньмылэн лыдыз Россилэн рекордъёсызъя книгае пыртэмын луоз».
 
«Пельнянь — удмуртъёслэн сиёнзы» бренд кылдӥз ни. 3 ар талэсь азьвыл трос юанъёс, пумитъяськонъёс вал ке, туннэ ваньмызлы валамон ини — пельнянь Кам шур котырын кылдыса, быдэс кунамы вӧлмиз. Пумен со кунгож сьӧры но выже. Швейцариын, кылсярысь, пельняньлы сӥзем ӝытъёс ортчыло ини. Соосты адӟиз кырӟась Надежда Уткина.
 
«Но отын пельнянез асьсэос уг лэсьто, шуэ Надежда. — Отын люкасько дась кутэм пельнянез дэмен сиыны. Нош асьмеос сое нырысь ӵошен пӧраськом, собере гинэ сииськом».
 
Матысь нуналъёсы «Пельняньлэн дунневыл нуналэз» фестиваль улсын пӧртэм ужрадъёсы пыриськыны, пумо пельняньёсты веряны луоз ини. Нош тужгес но яркытэз, шунытэз но ческытэз ортчоз 11-тӥ шуркынмонэ Ижкарысь Шор площадьын.