Пельнянь сиёнъя рекорд пуктэмын

    Пельнянь сиёнъя рекорд пуктэмын 1

    Ческыт сиськыны яратӥсьёс Ижкарысь Шор площаде быдэс шаерысь вуизы. Шулдыръяськонэ котькуд мылкыд карись пыриськиз: одигъёсыз пяльнянь кутыны дышетскизы, мукетъёсыз ӵошатсконъёсы пыриськизы, куинетӥосыз огшоры пельнянь сиыны ветлӥзы.
     
    Трос ужъюртъёс фестивале пыриськизы, ужрадлы удмурт шӧм пыӵатыны тыршизы. Фестивальлэсь палэнэ ӧз кыле творческой адямиос но. Пельняньлы сӥзем трос кылбуръёс, кырӟанъёс, такмакъёс чузъяськизы.
     
    Калыкез шулдыртон — бадӟым инты басьтӥз пельняняьлы сӥзем фестивальын — пусъё радъясьёс. Но валтӥсез ужпум кык ар талэсь азьло кадь кылемын. Вера Элькунысь йӧскалык политикая министр Лариса Буранова: «Ми турттӥськом возьматыны быдэс дуннелы удмурт калыклэсь, удмурт шаерлэсь чеберлыксэ. Макем асьмелэн узыр кылмы, мур сямъёсмы. Со понна ортчытиськом та фестивалез».
     
    Пельняньлы сӥзем фестиваль кыстӥськиз 11 нунал. Чакламъёсъя, 30 сюрс адями 74 сюрс пельнянь сииз — соос пӧлын пӧртэм федерал телеканалъёсысь, интерет изданиосысь но газетъёсысь журналистъёс. Соин валче вераны луэ: пельняньлэн дорез, Удмурт шаер сярысь быдэс дунне тодӥз.