«Пельнянь Battle»-ын вожвылъяськизы журналистъёс
«Известия Удмуртской Республики» газетын ужасьёс куное ӧтчазы «Удмурт дунне» газетын но Печатья но ивор вӧлмытонъя агентствоын ужасьёслэн командаоссэс, пельнянь батл ортчытӥзы, нош ваньмызлы мастер-класс возьматӥз «Известия Удмуртской Республики» газетын ужась фотокорреспондент Павел Шрамковский.
Вожвылъяськон дыръя командаосысь быдэн одӥг мурт пельнянез ӝог кутыны быгатэмзэс возьматӥзы но тунсыко юанъёслы валэктон сётӥзы. Трос конкурсъёсын «Удмурт дунне» газетлэн командаез вормонъёс басьтӥз.
Редакторлэн Зинаида Рябининалэн аспӧртэм рецептэзъя дасям губиен пельняньмы тужгес ческытэз лыдъямын. Печатья но ивор вӧлмытонъя агентствоын ужасьёс аспӧртэм хинкали лэсьтэменызы паймытӥзы, «Известия Удмуртской Республики» газетын ужасьёс пельняньзэс калыклы чебер ӵектӥзы. Тужгес шаплы пельнянь кутыны быгатэ вылэм та газетысь ик Людмила Моисеева.