«Палэзязы» удмурт, пор но коми егитъёс

Коньывуонэ быдэс дуннеын фин-угор калыкъёслэн культураоссылы сӥзем арняос радъясько. 18-тӥ-20-тӥ коньывуонэ Удмуртиын «Палэзян» фестиваль ортчиз. Туэ фестивалез радъясьёс, Эшъяськон юртысь ӧнерчиос но «Шунды» огазеяськонлэн ёзчиосыз, «Палэзянэз» егитъёслэн творчествозылы сӥзьыны малпазы.

Ужрадэз мытӥз «Мотор калык» ӝыт. 18-тӥ коньывуонэ вань мылкыд карисьёс быгатӥзы пор но удмурт калык эктонъёсын, шудонъёсын тодматскыны.

Шаерамы улӥсь пор егитъёс ӝыны ар талэсь азьло огазеяськизы эктонъя «Шочмо вож» («Асьме выжыос») коллективен. Соос вакчи дыр куспын пӧртэм ужрадъёсы пыриськыны вуттӥзы, Удмуртиысь уно калыкез пор эктонъёсын тодматӥзы. «Палэзянлэн» ужрадаз люкаськемъёслы соос асьсэ быгатонлыкъёссэс возьматӥзы, калыксы, сямъёссы сярысь мадизы.

Удмурт кун университетысь студентъёслэн «Чипчирган» ансамбльзы (дышетӥсьсы Лилия Леонтьева) тыршиз люкаськем калыклы удмуртъёслэсь культуразэс котыр ласянь возьматыны: огинэ бичаськизы уйпал, лымшор, камсьӧр удмуртъёслэн гуръёссы, эктонъёссы но шудонъёссы.

Ӵемысь бадӟым фестивальёсты крезьгуро концертъёс йылпумъяло, «Палэзян» но пӧртэм ӧз луы. 20-тӥ коньывуонэ Эшъяськон юртын калык гуръёс но электрон крезьгур огазеяськизы.
Учкисьёс азе потӥзы шаерысьтымы тодмо артистъёс: Катерина Кенjали но post-dukes группа.

Нырысьсэ удмурт сцена вылэ потӥз Пермь улосысь Коми-Пермяк округысь «Туригум» ансамбль. Алина Сайкинова, Виктория Лунегова но Снежана Радостева быдэсъяло коми-пермякъёслэсь калык кырӟанъёссэс, туала электрон аранжировка лэсьтыса. 2021-тӥ арын группа аслэсьтыз нырысетӥ альбомзэ поттӥз, нош 2022-тӥ арын «Потешки» кырӟанзылы клип пӧрмытӥз.