«Палэзян» фестиваль

«Палэзян» фестивальлэсь радъясьёс арлы быдэ пуштроссэ мургес, узыргес карыны тыршо. Туэ но трос тунсыко, аспӧртэм коллективъёс лыктозы. Соос пыр Палэзян фестиваль пӧртэм финн-угор малпанъёсты, ужъёсты шараяны, люканы луонлык сётоз. Кызьы шуиз Калыкъёслэн Эшъяськон юртысьтызы валтӥсь методист Елена Келарева, палэзь – со финн-угор выжыын огазеязь, герӟась пус луэ.

«Удмуртиын пӧртэм выжыысь калыкъёс уло. Соин ик котькудӥзлы верам, возьматэм потэ макем мур но тунсыко асьмелэн финн-угор лулчеберетмы».

Финн-угор лулчеберетэн Удмуртиын улисьёсты тодматозы ӧтем куноос но шаерысьтымы усточиос. «Пор шаерысь лыктэ егитъёслэн «Куат» коллективзы. Соос пӧлын кылбурчи, крезьгурчи, кырӟась Марина Садова. Со 4 ар талэсь азьло пичи калыкъёслы сӥзем «Элькуновидение» конкурсэ пыриськылиз, – азьланьтэ Елена Келарева. Пор куноос вуылозы Ижкарысь 11 номеро школае. Отын соос пиналъёсын пумиськозы.

Комиысь лыктэ «Севериада» рок-группа. «Бобровая долина» этнокомплексын асьме шаерысь «Silent Woo Goore», «Peace pu» группаосын ӵош концерт сётозы. Малпасько, соос крезьгуран кылынызы шедьтозы мар сярысь вераськыны.

Пусйытэк кельтэме уг поты Финляндиысь Минна Раскиненэз. Та фестивале со 4-тӥзэ лыктэ. Кылбурчи, крезьгурчи сяна, со финн калык интсрументэн кантелен шудӥсь. Фестиваль улсын со Пичи Пурга ёросэ крезьчиосты люкалоз».

Озьы ик фестиваль улсын котырес ӝӧк сьӧрын пумиськонъёс ортчылозы. Кылсярысь, лулчеберетлэн огез тужгес но кулэ луись, азинскись люкетэз — удмурт мода сярысь. Шаерысьтымы тодмо но али кутскись дизайнеръёс люкаськемъёсты удмурт костюмен, чеберъяськон тӥрлыкъёсын тодматозы. Нош куноос асьсэ шаеразы модалэн азинскемез сярысь фото-видеоужъёссэс возьматозы.