Пӧртэм калык выжыкылъёс удмурт кылын чузъяськизы туннэ Эшъяськон юртын

«Выжы-выжы-выжыкыл» фестиваль – «Удмурт нылкышно кенеш» огазеяськонлэн одӥгез проектэз, кудӥз элькунысь нылпи садъёсын удмурт кылэз азинтонлы сӥземын. Со туэ 5-тӥзэ ортче «Удмурт Кенеш» огазеяськон но йӧскалык политикая элькун министерство юрттэмен.

Туннэ фестивальлэн йылпумъян люкетаз 9 постановкаос возьматэмын вал: 8-сэ Ижкарысь пиналъёс пуктӥзы, 1-зэ – Пичи Пургаысь.

Фестиваль юри удмурт кылэз тодӥсьтэм пиналъёслы чакламын. Соин но выжыкылэз дасян бордын рос-прос тыршо визьнодасьёс но, анай-атайёс но — ӵош.

«Нырысь выжыкылэз лыдӟиськомы ӟуч сямен, собере учкиськомы видео, кыӵе образъёссы луыны кулэ шуыса. Собере гинэ дасяськыны кутскиськомы пиналъёсын. Но нырысь ик анай-атайёсын  дасяськиськомы, дышетӥсько соосты. Соос ини асьсэ пиналъёсынызы ужало. Тыршо. Уг ке быгато, жингырто», — вера Тамара Зайцева, 70 номеро нылпи садысь визьнодась.

Туэ фестивальлэн  аспӧртэмлыкез сыӵе — пӧртэм выжы выжыкылъёс — ӟуч, еврей, армян, таджик — удмурт кылын чузъяськизы. Кылсярысь, ваньмыз зэмос мед адӟиськоз шуыса, 184-тӥ нылпи садын ужасьёс элькунысь еврей огазеяськонлэн ёзчиосыныз кенешон вылысь пумиськылӥзы. Соос «Бедная вдова» еврей калык выжыкылэз пуктӥзы.

«Пинал вала, Удмуртиын удмуртъёс гинэ уг уло шуыса. Озьы ик вала, удмурт кыл — со кун кыл шуыса. Со вакытэ ик соос тодматско Удмуртиын улӥсь мукет калыкъёсын, сям-йылолъёсынызы», – вера Надежда Степанова «Выжы-выжы-выжыкыл» фестивалез радъясь.