Ӧтиськомы Кыккылолыкъя XIII-тӥ семинаре пыриськыны

    Ӧтиськомы кыккылолыкъя xiii-тӥ семинаре пыриськыны 1
    Котькуд пумиськон пӧртэм ужпумлы сӥземын луэ, верало «Билингва» огъетысь ӧнерчиос. Вуоноез семинар «Билингва: луонлыкъёсты огазеяськом» ним улсын ортчоз. Ужрадэ, котьку сямен, ӧтё удмурт кылын вераськись нылпиосты но анай-атайёссэс, озьы ик, семьяазы анай кылзэс утён сярысь сюлмаськись улосчиосты.

    Семинар ортче «Билингва. О практиках формирования двуязычия в современной городской среде» ӵектос быдэсъяськем улсын. Тодады вайытом, «Удмурт кенешлэн» та проектэз Азьмурт грантъёсъя Фондэн ялэм вожвылъяськонын вормись луиз.

    «Вуоно пумиськонлэн валтӥсь ужпумез – анай-атайёслы нылпиоссэс кык кыллы дышетыны юрттэт но валэктон сётон. Тодматом пӧртэм ресурсъёсын: телерадиопрограммосын, йӧскалык огазеяськонъёслэн тодон-валанъёсынызы, печатласькись ужъёсын, нылпиослы берло дыре поттэм шудонъёсын, книгаосын, кылдытэм мультфильмъёсын, кырӟанъёсын» – вера ӵектослэн кивалтӥсез Татьяна Волкова.

    Анай-атайёс сяна, семинаре ӧтемын «Удмуртия» издательствоысь но «Мынам Удмуртие» телерадиокомпаниысь ӧнерчиос, удмурт мерлыко огазаяськонъёслэн кивалтӥсьёссы.

    Дышетон амалъёс чотын андроид ватсэтъёсын но кыккылолыкъя «Билингва» удмурт центрлэн сайтэныз тодматскон радъямын луоз.

    Семинар ортчон вакытэ 2-сен 9 аресозь нылпиос понна тодон-валан сётонъя шудонъёс чакламын. Котькуд анай-атай психологен, логопедэн, кыккылолыкъя ӧнерчиен нимаз кенешыса визь-нод басьтыны быгатоз.

    Ужрад кутскоз 11 часысен, пусйиськон – 10 час 30 минутысен (Ижкар, Калыкъёслэн Эшъяськон юртсы, Орджоникидзе нимо урам, 33 а).