Ортчиз ньылетӥез «Выжы-выжы-выжыкыл» фестиваль

Ижкарысь 112 номеро нылпи садысь усточиос «Эштэрек но Вумурт» удмурт мадья пуктэм сценказэс возьматӥзы. Та садысь нылпиос котькуд ар пырисько фестивале. Пӧлазы чылкак удмурт кык пинал гинэ. Визьнодасьёс артист быгатонлыкенызы ӵош нырысь ик тыршо пиналъёслэсь удмурт кылын вераськыны устолыксэс.

«Ӟуч пиналъёсты туж умой дышетыны фольклор вылын, соослы со матын луэ, — шуэ нылпи садысь удмурт кылъя дышетӥсь Галина Корняева. — Выжыкылэз туж ярато, Лӧпшо Педунь сярысь лыдӟиськомы, мадёсъёсты. Ми пуктӥмы «Эштерек но Вумурт» легендаез. Нырысь ми сое ӟуч кылын пуктӥм, собере удмурт кылэ берыктыса тупатӥм».

«Выжы-выжы-выжыкыл» вожвылъяськон-фестиваль «Удмурт нылкышно кенеш» огазеяськонэн нырысь ик Ижкар понна кылдытэмын вал, берло ньыль арзэ со элькун инлыкен мынэ. Ужрадэ каръёсысь но ёрос центръёсысь удмурт кылэз, удмурт йылолъёсты дышетӥсь нылпи садъёс пырисько.

Туэ Элькунысьтымы 22 нылпи садъёс вожвылъяськизы, тямысэз финалэ потӥзы. Пичи Пургалась, Алнашысь, Глазовысь но Ижкарысь егит артистъёс мыло-кыдо шудӥзы финн-угор калыкъёслэн выжыкылъёссыя пуктэм сценкаосын. Ваньзы соос пӧртэм номинациосъя призъёс басьтӥзы.

«Азьланяз фестиваль улосвылкуспо луыны быгатоз, — вера вожвылъяськонэз радъясь Надежда Степанова. – «Удмурт нылкышно кенеш» ӟеч кусыпъёс юнматӥз Башкириен но Татарстанэн.  Вераськон мынӥз бигер шаерысь нылпиос пӧлын проектмес азинтом шуыса».

http://www.myudm.ru/