Нырысетӥ куриськонъёс «Элькуновидение-2018» вожвылъяськонэ Эграысь вуизы
«Гармония» коллективын туннэ нуналлы 59-сен 70 аресозь тямыс пыриськисьёс – ньыль кышномурт но ньыль воргорон. Кырӟасьёс пӧлын Удмуртиысь лулчеберет удысысь дано ужасьёс но гурт удысысь дано ужасьёс вань. Ӵапак гурт удысысь дано ужась, Виталий Лекомцев, «Элькуновидение» сётэм «Эшъёсын пумиськон» кырӟанлэсь кылъёссэ гожтӥз.
«Со кырӟанмы вордскиз кылем арын, 2017-тӥ арын. Виталий Григорьевич, гурт удысысь дано ужась, самодеятельностьын туж шаплы егит дырысеныз. Со кылбуръёс но гожъя вылэм, ми со сярысь ум но тодӥське вал. Тани кызьы ке но кылбуръёсыз туж усто тупазы со крезьгурлы, кудзэ мон шуак кылӥ пушкам», — шуэ Сергей Чирков, «Гармония» ансамбльлэн кивалтӥсез.
Кивалтӥсь верамъя, «Элькуновидение» пыриськон ансамбльлэн творчествоеныз тросгес калыкез тодматыны луонлык сётэ.
«Элькуновидение» — со сыӵе яркыт конкурс Удмуртиын, кудӥз паськыт аудиторилэсь дунъет басьтыны луонлык сётэ. <…> Мон кивалтӥсь кадь тыршисько, адямиос, Удмуртиысь но Россиысь калык, мед тодозы милемыз но котьку дась луозы концертъёсамы лыктыны шуыса», — вера Сергей Чирков.
Ватсалом, Эгра каргуртысь «Гармония» ансамбль ог 5 ар сцена вылын кырӟа ни. Сергей Чирков коллективен 2016-тӥ арысен кивалтэ. Ансамбльлэн репертуараз удмурт но ӟуч кылын кырӟанъёс вань. Кырӟасьёс элькун, росси но калыккуспо конкурсъёсы пырисько но ӵемысь вормонъёсын берто. Кылсярысь, 2017-тӥ арын «Прибалтийская весна» калыккуспо вожвылъяськонлэн лауреатъёсыз луизы.