Нырысетӥез куриськон вуиз «Элькуновидение» вожвылъяськонэ пыриськон понна
«Куриськонзы вань али Пургаослэн гинэ — «Эрик» группа, «Ижкар вера» кырӟанэн, кылъёсыз Анастасия Шумиловалэн, крезьгурез Дмитрий Григорьевлэн. Ёросъёс дасясько шуыса тодӥськом, тросаз отборочной туръёссы луозы на, кылсярысь, Глазов ёросын 22 куарусёнэ. Отын карлэсь но, ёрослэсь но пыриськисез быръёзы, — вера конкурсэз огез радъясь Светлана Пикулева.
Нялтас вераса, Балезино ёросын конкурсэ пыриськисез гудырикошконэ бырйизы ни вал. Таяз арын ёрослэсь данзэ утёз Юндаысь Надежда Сидорова.
Удмуртиысь кырӟанъя валтӥсь вожвылъяськонэ пыриськыны малпасьёс дыртыны кулэ — куриськонъёсты кутон йылпумъяськытозь кык арня кылиз. Кызьы верамын вал азьвылгес, со вакыт 30-тӥ куарусёнозь кыстӥськоз.
«Азьвыл аръёсъя учконо ке, ёросъёс, али сямен ик, берпуметӥ нуналозь куриськон сётонэз кыско, собере сюлворо, басьтэ на шуыса. Тодӥськом, Ижкарысь кӧня ке ёросъёс пыриськыны дасясько, Татарстанысь, Башкортостанысь вазиськонъёс вал ини, но нимлыко заявкаоссэс ӧз сётэ на. Малпаськом, Марий Элысь удмуртъёс луозы. Озьы ик вань ёросъёс, оскиськом, уз бероме, усто кырӟанъёссэс но быгатӥсь кырӟасьёссэс калык азе поттозы, — пусйиз Светлана Пикулева.
Тодэ вайытом, удмурт кырӟанъя «Элькуновидение» вожвылъяськон куатетӥез луоз ни. Коньывуон толэзьлэн нырысетӥ шутэтскон нуналъёсаз радъяськоз быръён люкетэз. Со пыр потэмъёс быгатонлыкъёссэс конкурслэн валтӥсь люкетаз возьматозы. Со ортчоз 21-тӥ коньывуонэ «Аксион» культура дворецын. Устоосыз «Элькуновиденилэн» йылпумъян люкетаз пыриськозы.